"Qarabağ"ın potensial rəqibi bəlli olub-RƏY

Bölmə: İdman › ,
Tarix: 15:53 05.08.2024

"Qarabağ"ın UEFA Çempionlar Liqasının pley-off mərhələsindəki potensial rəqibi bəlli olub.

Azərbaycan çempionu III təsnifat mərhələsində Bolqarıstan təmsilçisi "Ludoqorets"i mübarizədən kənarlaşdırsa, “Dinamo” (Zaqreb, Xorvatiya) ilə üz-üzə gələcək.

 

Rəqiblə bağlı "informator.az"a fikirlərini bölüşən Elçin Cəfərov ilk növbədə təbii ki, "Ludoqorets"i keçmək lazım olduğunu bildirib:

 

"Pley-offda rəqib "Dinamo"dur, demək olar ki, hər mövsüm mütəmadi olaraq avrokuboklarda qrup  mərhələsində mübarizə aparan kollektivdir. Ötən mövsüm əvvəlki sezonlara nisbətən çətinliklərlə üz-üzə qalsa da çempion olmağı bacardı. Hücum xətti daha təhlükəlidir. "Qarabağ"ın işi çətin olacaq, amma nəzərə alsaq ki, "Qarabağ" ötən mövsüm Avropada ən yaxşı futbol nümayiş etdirən iki, üç kollektivdən biri idi. "Bayer Leverkusen"ə qarşı nümayiş etdirdiyi oyun hər kəsə bəllidir. "Dinamo" keçiləsi rəqibdir. "Qarabağ" fiziki olaraq istənilən səviyyəni yaxaladığı təqdirdə rəqibin kim olduğu önəmli deyil".

Müsahib "Qarabağ"ın hazırki rəqibi "Ludoqorets" haqqında da danışıb:

 

" "Qarabağ"ın avrokuboklarda uğurlu təsir bağışlaması digər rəqiblər üçün ciddi kollektiv halına gəlib. "Ludoqorets" də avrokuboklarda müəyyən təcrübəsi olan komandadır, amma heyət və oyun keyfiyyəti baxımından "Qarabağ" onu üstələyir. Məncə bu mərhələni çətinlik çəkmədən keçə biləcək".

 

Zəhra Həsənova