İxtisas artırmada əsas problem: "Zamanın tələblərinə cavab vermir"!-RƏY
Bölmə: Sosial ›
,
Tarix: 20:59 30.09.2024
"Azərbaycanda müəllimlərin ixtisas artırma proqramları təhsilin keyfiyyətini yüksəltmək və müəllimlərin peşəkar inkişafını təmin etmək baxımından mühüm əhəmiyyət kəsb edir. Lakin bu sahədə hələ də bir sıra problemlər mövcuddur. Əsas problemlərdən biri ixtisas artırma proqramlarının məzmununun zamanın tələblərinə tam cavab verməməsi və daha çox nəzəri biliklərə fokuslanmasıdır".
Bu sözləri "informator.az"a açıqlamasında Təhsil eksperti Kamran Əsədov söyləyib.
Ekspert müəllimlərin peşəkar inkişafı üçün yeni təşəbbüslərin həyata keçirilməsindən bəhs edib:
"Azərbaycan Respublikasının Təhsil Nazirliyi və müxtəlif təlim mərkəzləri tərəfindən təşkil olunur və müəllimlərə yeni metodik biliklər, pedaqoji yanaşmalar və rəqəmsal texnologiyaların istifadəsi barədə biliklər qazandırmağa yönəldilib. Müəllimlər praktiki bacarıqlarını artırmaq üçün daha çox əyani təlimlərə və praktik sessiyalara ehtiyac duyurlar. Müəllimlərin peşəkar inkişafı üçün son illərdə bir sıra yeni təşəbbüslər həyata keçirilir. Bu təşəbbüslərin əsas fərqi ondan ibarətdir ki, onlar yalnız ənənəvi ixtisas artırma proqramlarına deyil, həm də müəllimlərin şəxsi və peşəkar bacarıqlarının inkişaf etdirilməsinə yönəlib. Təhsil Nazirliyi və digər qurumlar tərəfindən həyata keçirilən yeni təşəbbüslərdən biri sertifikasiyadan keçən müəllimlər üçün fərdi inkişaf planlarının hazırlanmasıdır. Sertifikasiyadan keçmiş müəllimlərə onların zəif tərəflərini gücləndirəcək xüsusi təlim və inkişaf proqramları təklif olunur".
Kamran Əsədovun sözlərinə görə, peşəkar inkişaf proqramlarında beynəlxalq təcrübələrin tətbiqi də genişlənməkdədir:
"Məsələn, son dövrlərdə “STEM” (Elm, Texnologiya, Mühəndislik və Riyaziyyat) təlimləri, rəqəmsal təhsil alətləri və tənqidi düşüncənin inkişafı üzrə yeni tədris proqramları tətbiq olunur. Bu təşəbbüslər beynəlxalq təhsil sistemlərinə uyğun olaraq müəllimlərin metodik yanaşmalarını təkmilləşdirməyi və şagirdlərin XXI əsr bacarıqları ilə təchiz edilməsini hədəfləyir. Müasir təşəbbüslərin mahiyyəti isə müəllimlərin sadəcə bilik ötürən deyil, həm də yenilikçi və araşdırmaçı olmasını təmin etməkdir. Belə təşəbbüslər təhsil sistemini daha çevik və dinamik hala gətirir. Müəllimlər bu yeni təşəbbüslər sayəsində şagirdlərin fərdi ehtiyaclarına daha çevik cavab verə bilirlər və onları qlobal əmək bazarına hazırlayırlar. Bu, Azərbaycan təhsil sistemində innovativ düşüncənin formalaşmasına və müəllimlərin öz peşəkar fəaliyyətlərini inkişaf etdirməsinə ciddi təkan verir. Ümumiyyətlə, müəllimlərin ixtisas artırma proqramları və yeni peşəkar inkişaf təşəbbüsləri Azərbaycanın təhsil sistemində keyfiyyət dəyişikliyinə doğru atılan mühüm addımlardır. Bu proqramların mahiyyəti müəllimləri həm ənənəvi tədris yanaşmalarını yeniləmək, həm də onları texnoloji və metodoloji yeniliklərə uyğunlaşdırmaqdır".
Fatimə Abdulrəhimli
