Zelenski və Putinin danışıqları niyə uğursuz olub?

Bölmə: Siyasət › ,
Tarix: 22:18 15.07.2025

 

Ukrayna Prezidenti Vladimir Zelenski və Rusiya rəhbəri Vladimir Putin səviyyəsində birbaşa danışıqlara əsas maneə Moskvanın destruktiv mövqeyidir.Bu fikirləri Ukraynanın Türkiyədəki səfiri Nəriman Cəlalov bildirib.

 

“Prezident Vladimir Zelenski belə bir görüşə hazır olduğunu dəfələrlə bəyan edib. Amma hələlik əsas maneə Rusiyanın destruktiv mövqeyidir - qeyri-səmimiliyi, danışıqlardan sülh əldə etməkdənsə, təzyiq vasitəsi kimi istifadə etmək istəyidir”, - səfir vurğulayıb.

 

Cəlalov qeyd edib ki, Ukrayna Rusiya-Ukrayna danışıqları platformasına çevrilməyə razılıq verdiyi üçün Türkiyəyə minnətdardır. Bununla belə, o vurğulayıb ki, mənalı danışıqlar o zaman mümkündür ki, hər iki tərəf beynəlxalq hüquqa və Ukraynanın suverenliyinə hörmət etsin.

 

Mövzu ilə əlaqədar Ağ Partiya sözçüsü, siyasi şərhçi Cavanşir Abbaslı “İnformator.az”a açıqlamasında bildirib ki, proseslərin gedişatı ortadadır:

 

“Artıq aydındır ki, Rusiya Ukrayna müharibəsini qalibiyyətlə başa vuracaq. Faktlar bunu göstərir — Rusiya bu müharibənin qalibidir.Putinin də mövqeyi bəllidir. O, heç vaxt Zelenski ilə bir masa arxasında əyləşməyəcək. Çünki Putin əvvəldən bu müharibədə qalib gələcəyini qarşısına məqsəd qoyub. Öz mövqeyini açıq şəkildə ortaya qoyub. Və proseslərin inkişafı da bu istiqamətdə gedir. Bu, reallıqdır.Bu gün sülh imzalansa belə, qalib tərəf Rusiyadır”.

 

Cavanşir Abbaslı bildirib ki, Türkiyəyə gəlincə, bu proseslərdə ən çox istək göstərən, ən güvənilən tərəf kimi görünür:

 

“Ancaq reallıq budur ki, Türkiyə bu savaşda heç vaxt vasitəçi olmayacaq. Çünki bu müharibə əslində Rusiya ilə Amerika arasında gedir, Ukrayna isə sadəcə vasitədir. Bu səbəbdən də tərəflər heç vaxt Türkiyənin vasitəçiliyini qəbul etməzlər.Bunu qəbul etsək də, etməsək də, reallıq budur. Təbii ki, bizim istəyimiz Türkiyənin vasitəçi olmasıdır, amma bu, mümkün deyil. Həqiqəti danışmaq lazımdır: Türkiyənin vasitəçiliyi məsələsi sadəcə arzu olaraq qalacaq.Reallıq budur ki, proses başa çatmaq üzrədir”.

 

Cavanşir Abbaslı yekun olaraq əlavə edib:

 

“Mən hər zaman demişəm: bu ilin sonuna qədər müharibə bitəcək və Rusiya qalib olacaq.O da böyük siyasətçilər qarşısında duruş gətirə bilməz.Hadisələr bu istiqamətdə inkişaf edir. Əlavə sübut və ya yazılı açıqlama da təqdim edə bilərəm, amma düşünürəm ki, bu açıqlama kifayət qədər aydın və konkret olub”.

 

Mahmudlu Ləman