Tramp, Epşteyn təzyiqi altındadır:-“Verdiyin sözə əməl et və sənədləri paylaş"
Bölmə: Siyasət ›
,
Tarix: 22:25 15.07.2025
ABŞ Prezidenti Donald Tramp, Ceffri Epşteynlə bağlı sənədlər məsələsində təzyiqi artıran seçicilərini sakitləşdirməyə çalışır. Tramp, istefası tələb olunan ədliyyə naziri Pam Bondini də müdafiə altına aldı.
Mövzu ilə bağlı politoloq Tural İsmayılov "İnformator.az"a açıqlamasında bildirib ki, Tramp bu həftə Epşteyn sənədləri ilə bağlı sualları "müqəddəsliyin pozulması" adlandıraraq kənara çəkməyə çalışıb:
"Bu susqunluq siyasi baxımdan problem yaradır, çünki Tramp seçki kampaniyasında Epşteyn sənədlərinin açıqlanacağını vəd etmişdi. Hazırda Trampın müttəfiqlərindən bəziləri administrasiyanın bu işdən əl çəkməsinə görə məyus olduqlarını bildirirlər. Susqunluğun arxasında bir neçə faktoru görmək mümkündür: birincisi, Ədliyyə Nazirliyinin yeni rəsmi baxışı Epşteynin "müştəri siyahısı" saxlamadığını və onun intihar etdiyini təsdiqləyir. İkincisi, Elon Musk kimi əvvəlki müttəfiqlərdən gələn ittihamlar ki, Epşteyn sənədləri Tramp şəxsən işə qarışdığı üçün açıqlanmır. Epşteyn sənədləri və Ədliyyə naziri Pam Bondi-nin işdən çıxarılması çağırışları bu həftəsonu mühafizəkar konfransda dominantlıq etdi. Bondinin müdafiəsi Trampın administrasiyasında bir neçə ciddi problemə işarə edir:Bondi əvvəllər Epşteynin "müştəri siyahısı"na sahib olduğunu iddia edirdi, indi isə bunun mövcud olmadığını deyir. Bu ziddiyyət hüquqi şəffaflıq baxımından ciddi suallar doğurur və dövlət qurumlarına etimadsızlığı artırır".
Politoloq həmçinin əlavə edib ki, administrasiya daxilində Bondi ilə FBI-ın yeni direktoru Dan Bongino arasında Epşteyn işinin idarə edilməsi barədə münaqişə yaranıb:
"Bu daxili qarşıdurma hökumətin vahid mövqeyinin olmamasını və koordinasiya problemlərini göstərir. Senatdan gələn təzyiq artır və Senator Wyden "əgər Prezident Tramp özü Epşteyn şəbəkəsinə qarışıbsa, o da cavab verməlidir" deyə bildirdi. Bu, müxtəlif siyasi fiqurlar üçün ciddi risklər yaradır. Siyasi risklər baxımından Tramp öz seçici bazasının etimadını itirir. Tramp MAGA hərəkatının Epşteyn məsələsinə fokuslanmasına tənqidi münasibət bildirdi, lakin bu, əsas dəstəkçiləri ilə arasında gərginlik yaradır.
Hüquqi risklər isə daha da mürəkkəbdir. Ağ Evdə və xaricdə Bondinin işə yanaşmasından narazılıq artır, çünki Ədliyyə Nazirliyi artıq bu məsələ ilə bağlı yeni sənədlər açıqlamayacağını bildirdi.Epşteyn sənədləri məsələsi Tramp administrasiyası üçün ciddi siyasi böhrana çevrildi. Şəffaflıq vədlərinin yerinə yetirilməməsi, daxili qarşıdurma və ictimai təzyiqin artması administrasiyanın etibarlılığını sarsıdır. Bu vəziyyət həm qısa, həm də uzunmüddətli dövrdə Tramp rəhbərliyinin legitimliyinə kölgə sala bilər".
Fatimə Heydərova
