Yol qəzalarında həyatlarından olan azərbaycanlı məşhurlar

Bölmə: Araşdırma › ,
Tarix: 14:51 15.08.2023

Hər ay ölkəmizdə onlarla yol qəzası baş verir və yüzlərlə insan bu qəzaların qurbanı olur. Əfsuslar olsun ki, sözügedən qəzalarda bəzən ən populyar, məşhur şəxslər həyatını itirir. İnformator.az yol qəzasında həyatını itirən azərbaycanlı məşhurlarla bağlı araşdırma aparıb.

Ağır qəzalarda vəfat edən həmin şəxsləri təqdim edirik:

Müğənni Rəcəb Musayev: “Yeni Ulduz-2” yarışmasında məşhurlaşan gənc müğənni Rəcəb Musayevin ölümünə səbəb olan qəza 2011-ci ilin yanvarında baş verib. Belə ki, ifaçı həmin ilin yanvarın 8-i axşam saatlarında Kürdəxanaı-Ləhic bağları istiqamətində hərəkət edən zaman idarə etdiyi “Mercedes” markalı avtomobilini aşırıb. Yüksək sürətlə hərəkət edən avtomobil bir neçə dəfə çevrilib. Ağır xəsarətlə 3 saylı xəstəxanaya çatdırılsa da, onun həyatını xilas etmək mümkün olmayıb.

Repçi Hüseyn Dərya: Hüseyn Dərya 2014-cü il martın 14-də gecə saatlarında avtomobil qəzası keçirib. Martın 15-də səhər saatlarında 3 saylı Şəhər Klinik Xəstəxanasında dünyasını dəyişib.

Meyxanaçı Bayram Kürdəxanlı: Vaxtı ilə “Maşın gəlir, qabağa baxım, sağa baxım?...” qafiyəsini tutan meyxanaçı Bayram Kürdəxanlının ölümünə səbəb olan qəza 2017-ci ilin avqustunda baş verib. Meyxanaçı Kürdəxanı qəsəbəsində yolu keçərkən qəsəbə sakini Emin Fərhadovun idarə etdiyi “Peugeot” markalı avtomobil onu vurub. B.Kürdəxanılı ağır xəsarətlərlə 3 saylı Şəhər Kliniki Xəstəxanasına çatdırılsa da, 55 yaşlı söz xiridarının həyatını xilas etmək mümkün olmayıb.

İdmançı Fərhad Poladov: Bədbəxt hadisələrdən biri də, Qaydasız MMA döyüşü üzrə dünya və Avropa çempionu olmuş Fərhad Poladovla bağlıdır. İdmançı “Koroğlu” metrostansiyasının yaxınlığında idarə etdiyi “Niva” avtomobili ilə hərəkətdə olarkən idarəetməni itirib. Nəticədə avtomobil səkiyə çırpılaraq yolun əks tərəfinə çıxıb və “Hyundai” markalı avtomobillə toqquşub. F.Poladov hadisə zamanı xəsarət aldığı sol ayağının və döş qəfəsinin sınığı diaqnozu ilə 3 saylı Şəhər Kliniki Xəstəxanasına çatdırılıb və əməliyyat edilisə də, 2019-cu il, iyunun 30-u səhər saatlarında həyatın itirib.

Tanınmış televiziya prodüseri, rejissoru Oqtay Əliyev: Azərbaycanın əməkdar mədəniyyət işçisi, tanınmış televiziya prodüseri, rejissoru Oqtay Əliyev yol-nəqliyyat hadisəsi nəticəsində dünyasını dəyişənlərdəndir. Hadisə 2023-cü il martın 22-də saat 18:15 radələrində Abşeron rayonu Saray qəsəbəsi ərazisində baş verib. Sürücü O.Əliyev hadisə yerində dünyasını dəyişib.

Bloger Diana Səfərova: Məşhur bloger, üç uşaq anası Diana Səfərova da bədbəxt hadisə nəticəsində vəfat edib. Bu bu barədə onun dayısı, müğənni Ənvər Nurqaliyev sosial şəbəkədə məlumat verib. Hadisə 2023-cü mayın 8-də baş verib.

Həcər Əmiraslanlı