Tarixdə bu gün - Mustafa Mahmudovun anım günü

Bölmə: Araşdırma › ,
Tarix: 22:53 20.12.2023

Bu gün Azərbaycan Xalq Cümhuriyyətinin qurulmasında müstəsna rolu olan, İstiqlaliyyət bəyannaməsini imzalayan 8 deputatdan biri, Məhəmməd Əmin Rəsulzadənin müəllimi olan Mustafa Mahmudovun anım günüdür

 

Mustafa Mahmudov 1878-ci ildə Göyçay qəzasının Kürdəmir kəndində anadan olub. Uşaqlıqda elmə marağı ilə yoldaşlarından seçilən Mustafa Qori Müəllimlər Seminariyasının Müsəlman şöbəsində təhsil alıb, 1899-cu ildə buranı bitirib. Müəllim kimi təyinatını Bakıya verməsində ona Həsən bəy Zərdabi və Əlimərdan bəy Topçubaşov kömək edib. İkinci Rus-Tatar məktəbində müəllim kimi işləyəndə sonralar Azərbaycan Xalq Cümhuriyyətinin banisi olacaq Məhəmməd Əmin Rəsulzadənin müəllimi olub.

 

Azərbaycan Xalq Cümhuriyyətinin qurulmasında müstəsna rol oynayan Mustafa Mahmudov sonrakı vaxtlarda Parlamentin bütün qərar və qanunlarının qəbul edilməsində aktiv şəkildə iştirak edib. Qızıl Ordunun işğalından sonra vətəni tərk etməyən Mustafa Mahmudov 1937-ci il dekabrın 20-də güllələnərək öldürüb. Mustafa Mahmudovun özündən başqa yaxın qohumlarının və ailə üzvlərinin bir çoxu Böyük təmizləmə zamanı repressiya qurbanı olub. Milləti üçün daim çalışan, vətənini, millətini həyatından, ailəsindən, hər şeydən üstün tutan bu qəhrəmanı Azərbaycan xalqı daim hörmətlə yad edəcək.

 

Yusif Mamedov