Top Gun və Batman filmlərinin ulduzu Val Kilmer 65 yaşında vəfat etdi

Bölmə: Dünya › ,
Tarix: 17:36 02.04.2025

1980-ci və 90-cı illərdə Hollivud filmləri ilə məşhurlaşan Kilmer, Top Gun və Batman Forever filmlərində də rol alıb. 1991-ci ildə isə The Doors filmində qrupun əfsanəvi vokalisti Cim Morrisonu canlandırıb. Kilmer çərşənbə axşamı Los-Ancelesdə dünyasını dəyişdi və ölüm səbəbi olaraq sətəlcəm göstərildi.

 

Onun qızı Mercedes atasının 2014-cü ildə qırtlaq xərçəngi olduğunu, lakin sağaldığını bildirib. Nəfəs borusundan əməliyyat olunması səsini və aktyorluq karyerasını təsirləndirsə də, o, 2022-ci ildə Top Gun: Maverick filmində Tom Kruzun yanında döyüş pilotu Iceman obrazını canlandırıb. Kilmerin ölümündən sonra Heat filminin rejissoru Maykl Mann onun son dərəcə təsir edici bir şəxsiyyət olduğunu bildirib. İnstaqram hesabında etdiyi paylaşımda Kilmerin uzun illər xəstəliklə mübarizə aparmasına baxmayaraq, şənliyini qoruduğunu və onun ölümündən dərin kədər hiss etdiyini qeyd edib. Aktyor Coş Qad isə "Uşaqlığımın bir çox filmini formalaşdırdın. Həqiqi bir ikon idin" deyə yazıb. Amerikalı aktyor Coş Brolin də İnstaqram hesabında "Görüşərik, dostum, sənin üçün darıxacağam. Tabe olmayan, ağıllı, cəsur, çox yaradıcı, dəli-dolu bir insan idin. Sənin kimilərdən çox qalmayıb" paylaşımını edib.

Mənbə: BBC News
Fatimə Heydərova