Avropa İttifaqı 36 min gəncə Avropanı qatar bileti ilə pulsuz gəzmək imkanı verəcək

Bölmə: Dünya › ,
Tarix: 19:20 02.04.2025

Brüssel – Aİ Komissiyası "DiscoverEU" adlı proqram çərçivəsində 36 min gəncə pulsuz səyahət kartı təqdim edəcəyini açıqlayıb.

 

Bu çərçivədə müraciətlər bu gündən başlayıb və seçilən namizədlər 1 iyul 2025 – 30 sentyabr 2026 tarixləri arasında 30 gün müddətində Avropa ölkələrində qatarla səyahət edə biləcəklər. Proqrama müraciət üçün 1 iyul 2006 – 30 iyun 2007 tarixləri arasında doğulmaq və Aİ ölkələrində və ya Erasmus+ proqramı ilə əlaqəli olan ölkələrdə (o cümlədən Türkiyə, İslandiya, Lixtenşteyn, Şimali Makedoniya, Norveç və Serbiya) yaşamaq tələb olunur. Müraciətlərin 16 aprel TSİ 13:00-da başa çatacağı bildirilib. Aİ 2018-ci ildən bəri davam edən və 2021–2027-ci illəri əhatə edən Erasmus+ proqramı çərçivəsində indiyə qədər 355 mindən çox səyahət kartı təqdim edib.

Anadolu Ajansı
Billurə Quliyeva