ABŞ-Ukrayna resurs razılaşması: Kiyev üçün risklər nədir?

Bölmə: Siyasət › ,
Tarix: 19:28 02.04.2025

 

ABŞ və Ukrayna arasında müzakirə olunan resurs razılaşması Kiyevin Avropa İttifaqına (Aİ) inteqrasiya səylərinə mane ola bilər. Bu barədə politoloq Züriyə Qarayeva "İnformator.az"a məlumat verib.

 

Politoloqun sözlərinə görə, müqavilənin hazırkı variantı Ukrayna iqtisadiyyatına ciddi təsir göstərə bilər. “Bu razılaşma ABŞ-a Ukraynanın enerji ehtiyatları üzərində nəzarət imkanı yaradır. Bundan başqa, Ukrayna müharibənin əvvəlindən aldığı hərbi və iqtisadi yardımı tam ödəməli olacaq”, – deyə Qarayeva bildirib.

 

O qeyd edib ki, müqaviləyə əsasən, ABŞ Ukraynada neft, qaz və digər enerji resurslarının işlənməsinə sərmayə yatıracaq və infrastruktur layihələrinə nəzarət edəcək. “Bura yollar, boru kəmərləri, limanlar və emal müəssisələri daxildir. Razılaşmaya görə, Ukrayna əldə etdiyi gəlirin 50 faizini birgə investisiya fonduna köçürməli olacaq”, – deyə politoloq əlavə edib.

 

Bundan başqa, hərbi yardımın geri qaytarılması məsələsi də müzakirə predmeti olub. “Müqaviləyə əsasən, Ukrayna ABŞ-dan aldığı silahlar üçün ən azı 100 milyard dollar ödəməlidir. Gecikmə olarsa, bu məbləğ illik 4 faiz artırılacaq”, – deyə politoloq qeyd edib.

 

Politoloqun fikrincə, razılaşma Ukraynaya təhlükəsizlik zəmanəti vermir:

“Bir neçə gün öncə Prezident Vladimir Zelenski ABŞ-la bu mövzuda danışmaq üçün hələ tez olduğunu bildirdi. Lakin o, əməkdaşlığa sadiq oldu".

 

Digər tərəfdən, ABŞ-nin keçmiş prezidenti Donald Tramp martın 24-də verdiyi açıqlamada Ukrayna ilə razılığa gəldiyini və bunun tezliklə imzalanacağını bəyan edib.

 

Mövzu ilə bağlı rəsmi açıqlamaların gözlənildiyi bildirilir.

 

Gülhüseynova Güllər