Moskvadan Lənkərana Yeni Aviareys Açılır
Bölmə: İqtisadiyyat ›
,
Tarix: 22:25 03.04.2025
"Utair" aviaşirkəti, aprelin 5-dən etibarən Moskvadan Lənkərana və əks istiqamətdə uçuşlar təşkil edəcək. Bu yeni reysin açılması bölgənin turizmini və iqtisadiyyatını inkişaf etdirəcək, həmçinin aviasiya sahəsində rəqabət mühiti yaradacaq.
Mövzu ilə bağlı Liberal İqtisadçılar Mərkəzinin sədri Akif Nəsirli "İnformator.az"a açıqlamasında bildirib ki, Moskva-Lənkəran aviareysinin açılması turizm baxımından böyük əhəmiyyət daşıyan bir layihədir:
"Lənkəran, həm kurort sanatoriya zonası, həm dəniz sahili, həm də subtropik iqlimi ilə xüsusilə cəlbedici bir bölgədir. Bu bölgənin Rusiya ilə sıx əlaqələri mövcuddur. Sovet dövründə burada yetişdirilən subtropik bitkilər Rusiya, xüsusilə Moskvaya ticarət məqsədilə daşınıb. Bu uzunmüddətli ticarət əlaqələri nəticəsində Lənkəran və Rusiya arasında sıx əlaqələr yaranıb. Həmçinin, Lənkəran əhalisinin böyük bir hissəsi bu gün də Rusiya Federasiyasında çalışır və ailələrinə maddi dəstək göndərir. Bu baxımdan Moskvadan Lənkərana olan aviareysin açılması əhalinin bu səfərləri üçün böyük əhəmiyyət kəsb edir və iqtisadiyyata müsbət təsir göstərə bilər".
Ekspert qeyd edib ki, bu reysin açılması aviasiya sahəsində rəqabəti artıracaq və digər aviareyslərin, eləcə də aviabiletlərin qiymətlərinin ucuzlaşmasına səbəb olacaq:
"Bakı və digər regional aeroportlara alternativ aviareyslərin açılmasının vacibdir. Məsələn, Füzuli aeroportu üçün aviareyslər, xüsusilə İran, Türkiyə və Rusiya kimi ölkələrdən açılmalıdır. Bu, aran bölgəsindən olan insanlara rahat bir yol təqdim edəcək, çünki Füzuli aeroportuna İmişlidən, Ağdamdan və digər ətraf rayonlardan ən çoxu 40 dəqiqəlik yol var, amma Bakıya gəlmək üçün 3-4 saat vaxt sərf etmək lazımdır. Bu cür regional aeroportların fəaliyyəti aviaşirkətlərin xidmətlərini daha əlverişli və ucuz edəcək.
Bundan əlavə, yeni fəaliyyətə başlayan "Utair" aviaşirkətinin fəaliyyəti "Azal"ın müştəri bazasına müəyyən qədər təsir göstərəcək. Bu, "Azal"ın müştəriləri cəlb etmək üçün daha yaxşı xidmətlər təklif etməyə vadar edəcək. Məsələn, artıq Lənkərandan Moskvaya uçmaq istəyən şəxslər "Azal"ın xidmətindən istifadə etməyəcək, əksinə, "Utair" aviareysindən yararlanacaqlar. Buna görə də, aviasiya sahəsində rəqabət mühitinin artması vacibdir. Gürcüstanın təcrübəsi buna yaxşı nümunədir. Tiflisdən və Kutaisidən müxtəlif aviaşirkətlərin uçuşlar təşkil etməsi qiymətlərin düşməsinə və sərnişinlərin daha sərfəli şərtlərlə səyahət etməsinə imkan verir. Məsələn, bəzən Tiflisdən Avropaya uçuşlar 60-70 dollara başa gəlir, halbuki Azərbaycandan Avropaya olan bilet qiymətləri 600-700 dollar və daha baha ola bilər. Bu cür rəqabət mühiti Azərbaycan vətəndaşlarına daha yaxşı və sərfəli səyahət imkanları təqdim edə bilər. Bu mühitin yaranması ilə vətəndaşlarımız bundan faydalanacaq".
Aytən Ağazadə
