"Qarabağ"ın UEFA Avropa Liqasının Liqa mərhələsində rəqibləri bəlli olub-ŞƏRH

Bölmə: İdman › ,
Tarix: 18:15 30.08.2024

"Qarabağ" Niderlandın "Ayaks", İngiltərənin "Tottenhem", Yunanıstanın "Olimpiakos", İsveçin "Malmö", Norveçin "Budyo Qlimt", Rumıniyanın FCSB və İsveçin "Elfsborq" komandaları ilə üz-üzə gələcək. Rəqiblərlə bağlı fikirlərini "informator.az"a bölüşən Elçin Cəfərov deyib ki, yeni liqa formatında önəmli rəqiblərlə üz-üzə gələcəyik:

 

"Bu format liqaya əlavə həyəcan qatacaq. Çempionlar Liqası səviyyəsində rəqiblərlə qarşılaşacağıq. "Ayaks" , "Tottenhem" , "Lion" , "Olimpiakos" nisbətən çətin rəqiblərdir. "Lion" son illərdə "PSG"nin kölgəsində qalan komandadır, buna baxmayaraq avrokubok təcrübəsi olan kollektivdir. "Tottenhem" sürətli futbol nümayiş etdirir. "Ayaks" isə futbol beşiyidir. Burada yetişən futbolçular tanınmış klublarda forma geyinir. Onlar da kifayət qədər sürətli oynayan və topa sahib olan kollektivdir".

 

Müsahib digər rəqiblər haqqında da fikirlərini bölüşüb:

 

" "Malmö" , "Budyo Qlimt" , "FCSB" komandaları ilə biz mövcud "Qarabağ" heyəti ilə mübarizə apara bilərik. "Qarabağ"ın uğurlu olması üçün transferə ehtiyacı var. Mütləq komandaya mərkəz müdafiəçisi, sol cinah müdafiəçisi lazımdır. Son matçda da gördük ki, "Qarabağ" müdafiədə ciddi səhvlərə yol verir. Hər bir halda "Qarabağ"a uğurlar arzu edirəm".

 

Zəhra Həsənova