Narkotik Asılılığına Qarşı Mübarizə Təliminə Start Verildi

Bölmə: Sosial › ,
Tarix: 13:41 17.12.2024

Azərbaycan Respublikası Gənclər və İdman Nazirliyinin dəstəyi ilə Sosial İnkişaf Yardım İctimai Birliyinin təşkilatçılığı və 18 nömrəli tam orta məktəbin ev sahibliyi ilə narkotik asılılığına qarşı mübarizə üzrə maarifləndirici təlimlərə başlanıldı.

İlk təlim 18 nömrəli tam orta məktəbdə keçirildi. Tədbiri məktəbin direktoru Leyla xanım açaraq iştirakçıları salamladı və bu maarifləndirici təşəbbüsün gənclərin sağlam və təhlükəsiz gələcəyi üçün vacibliyini vurğuladı.

Daha sonra Sosial İnkişaf Yardım İctimai Birliyinin icraçı direktoru və layihənin rəhbəri Zakir Quliyev çıxış edərək layihənin əsas məqsədləri, nəzərdə tutulan fəaliyyətlər və gözlənilən nəticələr barədə geniş məlumat verdi. O, layihənin gənclərin sağlam həyat tərzini təşviq etmək və narkotik vasitələrdən uzaq durmalarına dəstək olmaq məqsədi daşıdığını qeyd etdi.

DİN Baş Narkotiklərlə Mübarizə İdarəsinin Xüsusilə Mühüm İşlər üzrə Baş Əməliyyat Müvəkkili, polis polkovnik-leytenantı Natiq İsbatov hüquq-mühafizə orqanlarının narkotik vasitələrin qanunsuz dövriyyəsinə qarşı mübarizə sahəsində gördüyü işlərdən danışdı. O, gənclərin bu təhlükələrdən qorunmasında maarifləndirmə işlərinin əhəmiyyətini xüsusi olaraq vurğuladı.

Daha sonra Azərbaycan Respublikası Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun məsul əməkdaşı Vasif Quliyev çıxış edərək, narkotiklərə qarşı mübarizə istiqamətində həyata keçirilən dövlət tədbirlərini və qanunvericilikdə edilən dəyişiklikləri iştirakçılara çatdırdı.

Bakı şəhəri Narkoloji Mərkəzin həkim-narkoloqu Aytən Nadirli isə narkotik asılılığının fərdlər və cəmiyyət üçün yaratdığı ciddi təhlükələrdən bəhs etdi. O, asılı şəxslərin reabilitasiyası və cəmiyyətə inteqrasiyası üçün həyata keçirilən səhiyyə tədbirləri barədə məlumat verdi.

Tədbirin növbəti çıxışı layihənin təlimçisi Büllur xanıma məxsus oldu. O, gənclərin maarifləndirilməsi və məlumatlılığının artırılmasının narkotik asılılığına qarşı mübarizədə mühüm rol oynadığını qeyd etdi. Tədbir, iştirakçıların birgə xatirə fotosu çəkdirməsi ilə sona çatdı.

#AZEyouth #AzərbaycanGəncləri #AZEgrant2024 #birkimibirlikdə