“Siyasi iradə olmasa dövlət və cəmiyyət idarə etməsində xaosun şahidi olacağıq” -ŞƏRH

Bölmə: Siyasət › ,
Tarix: 18:17 02.04.2025

Cəmiyyətlərdə siyasi iradənin güclənməsi, zamanla baş verən mürəkkəb sosial, iqtisadi və mədəni dəyişikliklərin nəticəsidir. Bu proses cəmiyyətin strukturunun təkmilləşməsi və inkişafı ilə paralel olaraq, siyasi fəaliyyətin daha geniş kütlələrdən mənimsənilməsi və gücləndirilməsi ilə özünü göstərir. Tarixən siyasi iradənin güclənməsi yalnız cəmiyyətin idarə edilməsi ilə bağlı deyil, həm də fərdlərin öz hüquq və azadlıqlarını müdafiə etmə istəyi ilə əlaqədar olmuşdur. Sosial təbəqələşmə, iqtisadi inkişaf, şəhərləşmə və təhsil səviyyəsinin artması bu dəyişiklikləri stimullaşdıran əsas faktorlar kimi ön plana çıxır.

 

Bu barədə “informator.az”a danışan siyasi şərhçi Kənan Novruzov deyir ki, siyasi iradə olmasa dövlət və cəmiyyət idarə etməsində xaosun şahidi olacağıq:
 

“Siyasi iradə bir fenomen kimi həm cəmiyyət, həm də dövlət idarə etməsində müəyən proseslərin həyata keçirilməsi və onunla bağlı nəticələrin əldə olunması üçün ortaya qoyulan mövqedir. Cəmiyyət və hakimiyyətdə siyasi iradə olmadan digər məqsədlərə çatmaq mümkün deyil. Cəmiyyətdə siyasi idarə olmasa, vəziyyət vətəndaş müharibəsi səviyyəsinə çata bilər”.

 

Siyasi şərhçinin sözlərinə görə, siyasi iradənin güclənməsinin bir neçə səbəbləri var:

 

“Vətəndaş cəmiyyəti və ümumi cəmiyyətlə hakimiyyət arasında dialoqun qurulmasıdır. Cəmiyyət daxilində müxalifət və iqtidar arasında əlaqənin düzgün qurulmalıdır. Kənar ünsürlərin ölkədə cəmiyyət həyatına və bütövlükdə hakimiyyətlə cəmiyyət arasında münasibətlərə zərbə vurmasıdır. Müdaxilə etmənin qarşısının alınması və üçüncü qüvvələrin ictimai şüura müdaxiləsinin qarşısının alınması üçün vacibdir”.

 

Nurcan İsmayılova