Paşinyan revanşistləri susdurmaq üçün Azərbaycanın adından istifadə edir

Bölmə: Siyasət › ,
Tarix: 20:58 02.04.2025

 

Nikol Paşinyan deyib ki, separatçılar aksiyalarını davam etdirsə, bu Azərbaycanın qəzəblənməsinə səbəb olacaq. Paşinyan Azərbaycanın adından istifadə etməklə revanşistləri susdurmaq istəyir. O elə bir təsəvvür yaradır ki, Ermənistan güzəştə getməsə, guya Azərbaycan hücuma keçəcək. Paşinyan bununla öz tərəfdaşlarını artırmağa və seçkilərdə yenidən qalib gəlməyə çalışır. 

 

Mövzu ilə bağlı “İnformator.az”a açıqlamasında siyasi şərhçi Natiq Miri bildirib ki, revanşistlərin "boğazdan yuxarı" səsləndirilən ifadələrinə fikir vermək lazım deyil:

 

"Paşinyanın bu sözləri əslində, 2026-cı ildə baş tutacaq seçkinin əsas şüarı olacaq və seçkiyə “Ya sülh, ya da müharibə” şüarı ilə gediləcək. Bununla da ictimai rəyə mesaj ötürüləcək ki, ya Azərbaycanın şərtlərini qəbul edib sülh şəraitində yaşayıb, Ermənistanı gücləndirib, suverenliyini təmin etmək mümkün olacaq, ya da sülh olmayacaq, müharibə olacaq ki, buna da Ermənistan ictimaiyyəti hazır deyil. Revanşistlərin “boğazdan yuxarı” səsləndirilən ifadələrinə fikir vermək lazım deyil. Vəziyyət ciddi şəkil aldığı təqdirdə, heç bir Erməni anası övladını yeni müharibədə itirmək istəməyəcək. Ona görə də sülh məcburi seçimdir. Nikol Paşinyan da məhz bu incə məqamdan istifadə edərək bu notlar üzərində siyasətini quracaq. Qarabağdan öz xoşu ilə köçmüş ermənilərin etirazı heç bir əhəmiyyət kəsb etmir. Bir müddət sonra bu etiraz dalğası da tədricən sönəcək. Əslində, bunun davamlı olmasında həm də Paşinyan hökuməti müəyyən qədər maraqlıdır. Zamanında keşiş də 24 saat ərzində hökuməti istefaya çağırırdı. Amma xeyli müddət etiraz etməklə bütün enerjilərini sərf etdilər və özlərini ifşa etdilər. Bu gün Qarabağdan gedən ermənilərin etirazı baş vermiş olsa da, bunun potensialı o qədər də böyük deyil. Yəni, bu ciddi bir təhlükə törətmir. Nəzərə almaq lazımdır ki, Qarabağdan köçmüş ermənilərin ehtiyacını, maliyyə yardımlarını ödəyən Ermənistan hökumətidir. Ona görə də düşünmürəm ki, lazım olduqdan artıq bu etirazlar davam edə bilsin. Əks təqdirdə, bu yardımlar dayana bilər".

 

Siyasi şərhçi iki dövlət arasında gedən diplomatik danışıqlara da toxunub: 

 

"Diplomatik qapılar açıqdır və bu danışıqlar gedir. Düşünürəm ki, bu çox əhəmiyyətlidir. Çünki danışıqların olmadığı yerdə alternatiflər ortaya çıxır və bu da müharibə potensialını artırır. Danışıqlar davam etdikcə, ciddi hərbi qarşıdurmanın səbəbləri də aradan qalxır. Açığı, bunun üçün ciddi bir amil də yoxdur. Çünki Ermənistanın Azərbaycanla yeni hərbi toqquşmaya, müharibəyə potensialı yoxdur. Azərbaycan Prezidentinin də bəyan etdiyi kimi Azərbaycanın Ermənistana ərazi iddiası yoxdur. Belə olduğu təqdirdə, deməli müharibə üçün ciddi səbəblər də mövcud deyil. Sadəcə olaraq, sülhün olması üçün şərtlər var və bu şərtlər yerinə yetirilərsə, eskalasiyadan söhbət gedə bilməz. Nikol Paşinyan hökuməti özü də bu məsələdə maraqlı deyil. Baxmayaraq ki, müxtəlif fikirlər səsləndirilir, amma Paşinyan anlayır ki, növbəti bir hərbi toqquşmada olacaq məğlubiyyət Paşinyan hökuməti üçün parlament seçkilərində zərbə olar. Ona görə bilməliyik ki, diplomatik danışıqların mövcudluğu eskalasiyanın qarşısını alacaq çox ciddi siyasi amildir. Ermənistan rəhbərliyi danışıqlar yolu ilə bir-bir olsa da, Azərbaycanın şərtlərini qəbul edir. Konstitusiyanın dəyişdirilməsi məsələsi var ki, bununla bağlı artıq bəyanatlar var. Konstitusiya mətninin hazır olduğu bildirilib və əhaliyə təqdim olunacaq. Təqdim olunan mətndə Azərbaycana qarşı olan ərazi iddialarının aradan qaldırıldığı göstərilsə, düşünürəm ki, çərçivə sazişi imzalana bilər. ATƏT-in Minsk qrupunun ləğvi məsələsi var ki, Ermənistan hökuməti buna da hazır olduğunu bildirib. Hələlik sözdədir, ona görə də bunun əməli fəaliyyətə keçməsi üçün təzyiqlər davam edəcək".

 

Siyasi şərhçi separatçıların aksiyalarının nəticələrindən də danışıb: 

 

"Separatçıların aksiyaları elə də bir ciddi nəticə doğurmayacaq. Müəyyən qədər enerji xərcləndikdən sonra bu etirazlar səngiyəcək. Necə ki, keşişin aksiyalarından sonra etirazlar səngidisə, bu da elə səngiyəcək. Bu gün Nikol Paşinyan hökuməti də maraqlıdır ki, etirazlar olsun və tədricən sönməyə doğru getsin. Konkret nəticələr ortada olmadıqca etiraza qalxanların da sayı azalır və ümidsizlik yaranır. Ona görə də ciddi bir siyasi nəticə gözləmirəm".

 

Günel Verdiyeva