Qəzzada fəlakət qapıdadır! 2,4 milyon insan aclıq təhlükəsi ilə üz-üzə
Bölmə: Dünya ›
,
Tarix: 21:01 02.04.2025
Qəzza hökuməti İsrailin humanitar yardımları və yanacaq girişini əngəlləməsi səbəbindən bütün çörəkbişirmə sexlərinin bağlanmağa məcbur qaldığını və 2,4 milyon fələstinlinin aclıqla üz-üzə olduğunu açıqlayıb.
Qəzza hökumətinin Media Ofisi tərəfindən yayılan bəyanatda bildirilir: “İsrail işğal qüvvələri Qəzzadakı 2,4 milyon fələstinliyə qarşı yeni bir cinayət törədib. Bir ay ərzində un, humanitar yardımlar və yanacağın girişini əngəlləyərək, bütün çörəkbişirmə sexlərinin bağlanmasına və aclıq böhranının dərinləşməsinə səbəb olub. Bu vəziyyət mülki əhalinin həyatını ciddi şəkildə təhdid edir".
Bəyanatda İsrail və ABŞ hakimiyyətinin bu humanitar fəlakətə görə məsuliyyət daşıdığı vurğulanıb və beynəlxalq ictimaiyyətə, Birləşmiş Millətlər Təşkilatına (BMT) təcili müdaxilə çağırışı edilib.
BMT-nin dəstəklədiyi çörəkbişirmə sexləri də fəaliyyətini dayandırıb
Qəzza zolağındakı Çörəkbişirmə Sexləri Sahibləri Dərnəyinin sədri Əbdünnasir əl-Əcrami İsrailin sərhədləri bağlaması səbəbindən BMT-nin Qida Proqramı tərəfindən dəstəklənən bütün çörəkbişirmə sexlərinin fəaliyyətini dayandırdığını bildirib.
“Un, şəkər, duz, maya və dizel yanacağı kimi əsas tədarüklər tükənib. Çörəkbişirmə sexlərinin bağlı qalması yüz minlərlə insanı böyük humanitar böhranla üz-üzə qoyacaq", – deyə Əcrami vurğulayıb və vəziyyətin dərhal həll edilməsinin vacibliyini qeyd edib.
İsrail yardımları əngəlləyir, fələstinlilər ölür
İsrail martın 2-də Qəzzaya humanitar yardım, ərzaq və tibbi ləvazimat girişini tamamilə əngəlləyib. Bu isə bölgədəki humanitar böhranın daha da dərinləşməsinə səbəb olub.
İsrailin Baş naziri Binyamin Netanyahu martın 30-da verdiyi açıqlamada Qəzzaya hücumların artırılacağını və fələstinlilərin zorla köçürülməsi planlarının həyata keçiriləcəyini bildirib.
İsrail ordusu yanvarın 19-da qüvvəyə minən atəşkəsə baxmayaraq, martın 18-də Qəzzaya yenidən hücumlara başlayıb. Həmin tarixdən bu yana əksəriyyəti qadın, uşaq və yaşlılar olmaqla 1042 fələstinli həyatını itirib, 2542 nəfər isə yaralanıb.
İsrailin 7 oktyabr 2023-cü ildən bəri həyata keçirdiyi hücumlar nəticəsində 50 min 399 fələstinli həlak olub, 114 min 583 nəfər isə yaralanıb.
A haber
Günel Verdiyeva
