Netanyahu: “Biz Türkiyənin Suriyadan İsrailə hücum etmək üçün baza kimi istifadə etməsini istəmirik”
Bölmə: Siyasət ›
,
Tarix: 14:13 08.04.2025
Netanyahu qeyd edib ki, onlar Trampla “münaqişənin qarşısını almaq” üçün nələrin edilə biləcəyini müzakirə ediblər. İsrail-Türkiyə münasibətləri Ankaranın Suriyanın yeni administrasiyası ilə münasibətlərinə görə yeni gərginlik xəttinə daxil olub. İsrail ordusu aprelin 2-də Suriyada bir neçə hərbi və infrastruktur obyektlərinə zərbələr endirib. İsrail mətbuatına açıqlama verən rəsmilər, hərbi obyektlərdən birinə hücumun Türkiyəyə "mesaj" olduğunu bildirib. Netanyahu Oval Ofisdə keçirdiyi mətbuat konfransında Trampla “Türkiyə ilə bu münaqişənin necə qarşısı alınacağını” müzakirə etdiklərini bildirib və ABŞ liderinin bu mövzuda vasitəçi ola biləcəyinə işarə edib. Netanyahu, "Türkiyə ilə yaxşı münasibətlərimiz var idi, lakin onlar pisləşib. Suriyanın Türkiyə də daxil olmaqla, heç kim tərəfindən İsrailə qarşı hücumlar üçün baza kimi istifadə edilməsini istəmirik" deyib. Tramp isə sual-cavab sessiyasında prezident Ərdoğanla "gözəl münasibəti" olduğunu deyib və "Mən onu sevirəm, o da məni sevir" deyib. ABŞ prezidenti Ərdoğanla keçirdiyi görüşü də açıqlayıb.
Dəməşqin süqutundan sonra keçirilən görüşdə Tramp Ərdoğanı “Suriyanı aldığı üçün” təbrik etdiyini bildirib və “O, iki min ildə heç kimin edə bilmədiyi bir şey etdi” deyib. Söhbətin bu yerində Ərdoğanın ona “Xeyr, biz deyildik” deyərək cavab verdiyini ifadə edən Tramp, “Bilirəm, sən idin” dediyini də deyib və ona “Bəli, bəlkə də bizik” deyilib. Tramp daha sonra Ərdoğanın “ağıllı insan” olduğunu söyləyərək Netanyahuya üz tutaraq “Onunla hər hansı probleminiz varsa, həll edə bilərəm, ancaq məntiqli olsanız” deyib. “İranla birbaşa danışıqlar davam edir”
Trampın mətbuata əks etdirdiyi digər mövzu isə İranla nüvə danışıqları olub.
ABŞ prezidenti Tehranla birbaşa danışıqları davam etdirdiklərini bildirib və "Şənbə günü çox yüksək səviyyəli görüş olacaq" deyib. Tramp “Aydın olanı etməkdənsə, razılaşma etmək daha yaxşıdır” desə də, nə demək istədiyini açıqlamayıb. O əlavə edib ki, danışıqların uğurlu olması "İranın marağında olacaq".
Tramp daha sonra bir daha “Bəlkə İranla sövdələşmə bağlayaq, bu, əla olar” deyərək, ən yüksək səviyyəli nümayəndələrin Tehranla birbaşa əlaqə saxladığını bildirib. Tramp Fələstinlilərin Qəzzadan çıxarılması təklifini təkrarlayıb. Hər iki liderin mesajlarının əhəmiyyətli bir hissəsi Qəzzadakı müharibə ilə bağlı olub. Netanyahu Qəzzada saxlanılan girovların azad edilməsini də müzakirə etdiklərini və HƏMAS ilə yeni razılaşma üzərində çalışdıqlarını bildirib.
Tramp bir daha Qəzzanın gələcəyi ilə bağlı əvvəllər müzakirə etdiyi fikirləri, o cümlədən “fələstinlilərin göndərilməsi və ABŞ-ın Qəzzanın yenidən qurulmasını öhdəsinə götürməsi” ilə bağlı fikirlərini təkrarlayıb. Tramp Qəzza zolağının “hazırda heç kimin yaşamaq istəmədiyi gözəl yer” olduğunu deyib və orada “azadlıq zonası” yarada biləcəyini təklif edib. ABŞ prezidenti bir daha təklif edib ki, “fələstinlilər buradan çıxarılıb başqa ölkələrə göndərilməlidir”. Netanyahu həmçinin Qəzzanın yenidən qurulmasının illər çəkəcəyini söyləyərək, "Trampın Qəzza ilə bağlı bir vizyonu olduğunu və bunun üzərində birlikdə çalışdıqlarını" iddia edib.
BBC NEWS
Səftərova Səmayə
