Robert Prevost Katolik Kilsəsinin ilk Amerika papası olub

Bölmə: Dünya › ,
Tarix: 21:42 08.05.2025

 

 

Vatikanda baş verən tarixi bir hadisədə kardinal Robert Prevost Roma Katolik Kilsəsinin yeni lideri seçilərək, papalığa yüksələn ilk amerikalı olub. Bu xəbər Sikstin kapellasının bacasından qalxan ağ tüstü ilə elan edilib – bu, 133 kardinalın konsensusa gəldiyini göstərib.

 

Barselonadakı Sagrada Familia və Madridin Almudena Katedrali də daxil olmaqla, Roma və dünyanın müxtəlif kilsələrində zənglər çalınıb. Müqəddəs Pyotr meydanına toplaşan on minlərlə insan sevinclə "Viva il Papa!" nidaları səsləndirərək, yeni seçilmiş pontifikin ilk çıxışını səbirsizliklə gözləyib.

 

Papa Prevost çıxışdan əvvəl "Göz yaşları otağı" adlanan xüsusi bir otaqda – papalıq mantiyasını qəbul etdiyi yerdə – bir neçə dəqiqə keçirib. Daha sonra o, Müqəddəs Pyotr Bazilikasının eyvanına çıxaraq, Kilsənin yeni liderinin üzünü görmək üçün gözləyən dünya ilə ilk dəfə görüşüb.

 

İsveçrə Mühafizəçilərinin və hərbi orkestrlərin təntənəli yürüşü mərasimə xüsusi rəng qatıb. Yüksək rütbəli kardinallar ayinin fəxri qonaqları kimi iştirak ediblər, yaşlı və səsvermədə iştirak etməyən kardinallar isə bu anları izləyiblər.

 

Yeni Papa camaata ilk xeyir-duasını verməzdən əvvəl, “Habemus Papam” (“Bizim Papamız var”) rəsmi bəyanatı böyük kardinal tərəfindən elan olunub.

 

ABŞ-nin prezidenti Donald Tramp jurnalistlərin suallarını cavablandırarkən hadisənin simvolik məqamına toxunaraq zarafatla belə deyib: “Tüstünü gördüm, amma Papanı görmədim".

 

ANEWZ

Güllər Gülhüseynova