Ventura anti-Rom bəyanatlarına görə istintaqa cəlb olunub
Bölmə: Dünya ›
,
Tarix: 22:17 21.05.2025
Portuqaliya prokurorluğu ifrat sağçı siyasətçi Andre Ventura barəsində, ölkədə keçirilən son parlament seçkiləri ərəfəsində Rom (qaraçı) icmasına qarşı səsləndirdiyi qalmaqallı bəyanatlara görə cinayət işi açıb.
Çərşənbə günü baş prokurorluq tərəfindən açıqlanan istintaq, Rom icmasına dəstək verən və onların təhsil və məşğulluğu sahəsində çalışan "Letras Nómadas" adlı qeyri-kommersiya təşkilatı da daxil olmaqla 10 təşkilat tərəfindən verilmiş şikayət əsasında başladılıb. Şikayətdə qeyd olunur ki, Venturanın seçkidən öncə sosial mediada paylaşdığı videolar nifrətə təhrik xarakteri daşıyır.
Həmin videolardan birində Ventura bələdiyyələrin Rom icması üçün sosial evlər tikməsini tənqid edərək deyib: “Bəs biz niyə qaraçılar üçün ev tikirik? Biz normal insanlar üçün tikmirik?” Bu ifadələr Rom icmasının hüquqlarını müdafiə edənlər tərəfindən ayrı-seçkilik və təhqiramiz olaraq qiymətləndirilib.
“Bu video bizim üçün ən təhqiramiz olan idi, baxmayaraq ki, digərləri də kifayət qədər ciddi idi", – deyə "Letras Nómadas" təşkilatının vitse-prezidenti Bruno Qonçalves bildirib. “Ventura həmin videoda özü də bu sözlərə görə şikayət ediləcəyini söyləmişdi. O, sərhədi aşdığını bildirib".
Ventura, keçmiş hüquq akademiki və idman şərhçisi olaraq, 2019-cu ildə ifrat sağçı "Chega" partiyasını yaradıb. Partiya cinayətkarlara qarşı daha sərt cəzalar, immiqrasiyanın məhdudlaşdırılması və korrupsiyaya qarşı islahatlar tələb edir. 2022-ci ildə parlamentdə üçüncü ən böyük siyasi gücə çevrilərək sürətlə populyarlıq qazanıb.
2025-ci ilin mart ayında keçirilən ümumi seçkilərdə "Chega" yenidən güclənərək parlamentdə ikinci yeri bölüşüb. Nəticələrin yekunlaşması hələ davam etsə də, partiya rəsmi müxalifətə çevrilə bilər. Lakin seçkidə 89 mandat qazanan mərkəz-sağçı Demokratik İttifaqın (AD) lideri, baş nazir Luis Montenegro "Chega" ilə hər hansı bir ittifaqa girilməsini qəti şəkildə istisna edib.
ANEWZ
Gülhüseynova Güllər
