Afrikadan Avropaya qaçqın axınının artması
Bölmə: Siyasət ›
,
Tarix: 17:40 30.01.2025
Afrika ölkələrinin əksəriyyəti təbii sərvətlərə sahib olsa da, iqtisadi çətinliklər və qeyri-sabitlik səbəbindən əhalisinin böyük hissəsi Avropaya miqrasiya edir. Bu mövzu Afrikanın inkişafı, miqrasiya və beynəlxalq əməkdaşlıq məsələlərini əhatə edir.
Məsələnin əsasını Afrikanın zəngin təbii sərvətlərinin istismar edilməsi və bunun nəticəsində ölkənin sosial və iqtisadi vəziyyətinin pisləşməsi təşkil edir. Bununla yanaşı, Afrika xalqlarının həyat şəraitinin yaxşılaşdırılmaması və işsizlik səbəbindən miqrasiya axını sürətlənib.
Mövzu ilə bağlı “İnformator.az”a açıqlamasında politoloq Tural İrfan bildirib ki, Afrika ölkələrinin iqtisadiyyatının inkişaf etməməsi və əhalisinin sosial vəziyyətinin pisləşməsi ciddi problemlərə yol açır:
“Afrika ölkələrinin çoxu təbii sərvətlərə sahibdir, lakin bu sərvətlərdən faydalı şəkildə istifadə edilmir. Avropa dövlətləri Afrikanın təbii sərvətlərini istismar edib, bu da yerli əhalinin çətin sosial vəziyyətə düşməsinə səbəb olub. Bu səbəbdən Afrika xalqları daha yaxşı həyat şəraiti üçün Avropaya üz tuturlar. Müxtəlif Avropa ölkələrində bu miqrant axınının qarşısını almaq üçün tədbirlər görülür, lakin miqrantların sayı artmaqdadır. Hələ 2015-ci ildə BMT-nin Beynəlxalq Miqrasiya Təşkilatının nümayəndəsi Coel Nilman bildirib ki, qaçqın axını ilə bağlı rəqəmlər keçən illərlə müqayisədə daha çoxdur. Yalnız İtaliyaya il ərzində 54 min 660 miqrant köç edib. Yunanıstana gələnlərin sayı isə 46 min 150 nəfərdir. Bir həftə ərzində Liviya vasitəsilə Siciliya adasına keçən 7 000 afrikalı miqrant xilas edilib".
Tural İrfan həmçinin Afrikadan miqrant axınının səbəblərindən birinin də yerli iqtisadiyyatda inkişafın olmaması olduğunu qeyd edib:
“Afrika ölkələrinin çoxu iqtisadiyyatın digər sahələrini inkişaf etdirməkdə çətinlik çəkir. İqtisadiyyatın əsas sütunu olan kənd təsərrüfatı və sənaye sahələri zərər görür, bu da işsizliyin artmasına səbəb olur. Nəticədə insanlar Avropada daha yaxşı imkanlar axtarmağa başlayır. Bununla yanaşı, təbii fəlakətlər və münaqişələr də miqrasiya prosesini gücləndirir”.
Politoloq Tural İrfan problemin həlli yollarına da nəzər salıb:
“Afrika ölkələrinin inkişafı üçün xarici yardım deyil, daxili islahatlar vacibdir. Bu islahatlar iqtisadiyyatda rəqabətliliyi artırmalı, təbii sərvətlərin düzgün idarə edilməsini təmin etməli və yerli əhalinin həyat şəraitini yaxşılaşdırmalıdır. Bununla yanaşı, Avropa və Afrika arasında daha ədalətli əməkdaşlıq mexanizmləri qurulmalıdır ki, miqrant axınının qarşısını almaq mümkün olsun".
Nəzrin İsmayılova
