Kanadanın Liberal Partiyası seçkilərdə qalib gəlib

Bölmə: Dünya › ,
Tarix: 14:36 29.04.2025

Kanadada keçirilən milli seçkilərdə hakim Liberal Partiya qalib gəlib. Seçkilər ABŞ Prezidenti Donald Trampın ticarət müharibəsi və ilhaq təhdidlərinin fonunda baş tutub.

 

Baş nazir Mark Karni, Trampın təzyiqləri qarşısında özünü Kanadanın müdafiəçisi kimi təqdim edərək, Liberalları ardıcıl dördüncü dəfə seçki qələbəsinə aparıb. Bu, son vaxtlar Mühafizəkarlar Partiyası qarşısında zəifləyən Liberallar üçün gözlənilməz dönüş olub. Peşəkar iqtisadçı və bankir olan Karni, mart ayında vəzifəyə başlamazdan əvvəl heç bir siyasi vəzifə tutmayıb. O, seçki nəticəsini "Kanada üçün ayağa qalxmaq" və "ölkəni daha güclü qurmaq" üçün bir imkan kimi qiymətləndirib.

"Qarşıdakı günlər və aylar çətin olacaq və bəzi fədakarlıqlar tələb olunacaq. Ancaq biz bu yolda işçilərimizi və bizneslərimizi dəstəkləyəcəyik", – deyə Karni qələbə nitqində bildirib. O, kanadalılara "Amerika xəyanətindən" dərs almağı və bu dərsləri heç vaxt unutmamağı tövsiyə edib. Liberal Partiyası İcmalar Palatasında ən çox yeri qazansa da, təkbaşına hökumət qurub-qurmayacağı hələlik aydın deyil. CBC-nin ilkin proqnozlarına əsasən, Liberallar ən azı 165 yer, Mühafizəkarlar isə 147 yer əldə ediblər.

 

Liberallar son dəfə 2015-ci ildə parlament çoxluğunu əldə etmişdilər. 2021-ci il seçkilərində isə 160 mandatla nisbi üstünlük qazanaraq qanunları qəbul etmək üçün sol meyilli Yeni Demokrat Partiyasının dəstəyinə ehtiyac duyublar. Bu nəticə, yanvarda keçirilən sorğularda 20 faiz geridə olan sol mərkəzçi Liberallar üçün heyrətamiz bir dönüş hesab olunur.

Mənbə: Al Jazeera
Qəmər Kazımzadə