İran: Müharibənin Yolu Vaşinqtonun Təl-Əvivə Təzyiqindən Keçir

Bölmə: Dünya › ,
Tarix: 23:44 21.06.2025

 

İsrail və İran qarşılıqlı hücumlarını davam etdirərkən CNN İnternational-ın İrandakı komandası İran prezidentinin sözçüsü Məcid Fərahani ilə danışıb. İran sözçüsü eksklüziv müsahibəsində İsrail və ABŞ-yə mesaj göndərərək, diplomatiya üçün qapını açıq qoyub, həm də sərt xəbərdarlıqlar edib.

İran prezidentinin sözçüsü Məcid Fərahinin sözlərinə görə, müharibəni dayandırmağın yeganə yolu Vaşinqtonun Təl-Əvivə təzyiq göstərməsidir. "Düşünürəm ki, İsrail iki və ya üç günə qalib gələ biləcəyini düşünürdü. Amma indi görürsünüz ki, İran İrana nəzarət edir və İrana hər hücumda İsrailə bəzi raketlər atılır. Biz diplomatiyanın bütün aspektlərinə inanırıq. Ona görə də düşünürəm ki, əgər cənab Tramp Netanyahuya hücumları dayandırmağı əmr edərsə, diplomatiya asanlıqla yenidən başlaya bilər", - İran sözçüsü bildirib.

Farahani birbaşa və ya dolayı danışıqların vacib olmadığını və İranın sivil dialoqun tərəfdarı olduğunu deyib. Bununla belə, ABŞ-nin nüvə obyektlərində “bunker qıran” bombadan istifadə etmək planı barədə suala cavabında o, Tehranın buna hazır olduğunu bildirib. "Amerika müharibəyə qarışarsa, İran bütün imkanları qabaqcadan görüb və bizim əlimiz bağlı deyil. Çoxlu variant var", - o deyib.

O, İranın uranı zənginləşdirməyə davam edəcəyini də açıq şəkildə bəyan edib. "İran bunu dəfələrlə bəyan edib. Biz zənginləşdirəcəyik və zənginləşdirməni dayandırmağı qəbul etmirik. Zənginləşdirmə səviyyəsi daha aşağı ola bilər, lakin biz bundan sonra onu dayandırmayacağıq", - o deyib.

Bu bəyanatlar İran və Avropa ölkələri arasında Cenevrədə keçirilən 4 saatlıq görüşdən dərhal sonra verilib. Tehran vurğulayır ki, ABŞ masada olmasa, daimi həll mümkün olmayacaq.

Mənbə: CNN Türk
Türkan Kərimli