NATO bu il Ukraynaya 20 milyard avrodan çox hərbi yardım ayıracaq

Bölmə: Siyasət › ,
Tarix: 21:52 03.04.2025

2025-ci ilin ilk üç ayında NATO müttəfiqləri Ukraynaya 20 milyard avrodan çox hərbi dəstək verəcəyini vəd edib. NATO-nun yeni Baş katibi Mark Rutte bu yardımların davam edəcəyini və Ukraynanın müdafiə qabiliyyətinin gücləndirilməsinin prioritet məsələ olduğunu vurğulayıb.

 

Mövzu ilə bağlı konfliktoloq Elman Vəliyev "İnformator.az" saytına açıqlamasında bildirib ki, NATO-da əsas söz sahibi Amerikadır:

 

"NATO-da əsas söz sahibi Amerikadır. Tramp isə Ukraynaya qarşı aqressiv tutum sərgiləyir. Söz sahibi olduğu bir təşkilat fərqli addımlar atmağa çalışırmı? Məsələ də budur: Ya Amerika belə istəyir, ya da həqiqətən təşkilat daxilində fikir ayrılıqları mövcuddur. İkinci daha məntiqli görünür. Bəzi Qərb dövlətləri hələ də yardım etməyə çalışır, ona görə də Ukrayna hələ də mübarizə aparır. Ruttenin açıqlaması, əlbəttə, Rusiyada qıcıq yaradacaq. Amerika üçün heç bir təhlükə yoxdur, məkan olaraq da belə. Ona görə istədiyi kimi hərəkət edə bilər. Amma təhlükə Qərb üçün mövcuddur, ona görə də Ukraynaya dəstək göstərirlər. Lakin dəstək də bir yerə qədərdir," - deyə konfliktoloq bildirib.

 

Ukraynaya dəstəyin bu qədər artması müharibənin gedişatını necə dəyişdirə bilər?

 

"Qərb bütün əlində olanı Ukrayna üçün xərcləsə, özü nə edəcək bəs?! Ukrayna, Amerika ilə razılaşacaq. Qərbin təklifini isə Rusiya qəbul etməyəcək. Kompromis olacaq, amma Ukrayna lehinə bir şeylərin olacağını demək absurd və təvazökarlıq olar," - deyə Vəliyev vurğulayıb.

 

Səyyarə Mirzəyeva