Tarixdə bu gün-Fərhad Kərimovun doğum günü

Bölmə: Sosial › ,
Tarix: 12:54 11.12.2023

Bu gün 1995-ci ildə silahlı münaqişə zamanı öldürülmüş, Rori Pek adına təsis edilən müfakata layiq görülən- Fərhad Kərimovun doğum günüdür.

 

Fərhad Kərimov 11 dekabr 1948-ci ildə Moskva şəhərində anadan olub. 1973-cü ildə Azərbaycan Dövlət Universitetinin fizika-riyaziyyat fakültəsini bitirib. Bir müddət Azərbaycan Milli Elmlər Akademiyasında çalışıb.

 

O, 1987-ci ildən peşəkar jurnalistika fəaliyyətinə başlayıb. İlk vaxtlar "Molodyoj Azerbaydjana" qəzetində müxbir kimi çalışıb. 1991-ci il, 1 oktyabr tarixindən Turan İnformasiya Agentliyində informasiya şöbəsinin redaktoru vəzifəsini tutub.

 

1992-ci ildən Röyter və Assoşieyted Press agentlikləri ilə əməkdaşlığa başlayıb. 1992–1994-cü illərdə Qarabağ müharibəsinin ən qaynar bölgələrindən videosüjetlər hazırlayıb. O, həmçinin Gürcüstan və Tacikistandakı müharibə zonalarından bir çox reportajların müəllifi olub.

 

Çeçenistanda gedən müharibə zamanı hazırladığı reportajlar ona dünya şöhrəti gətirib. O, döyüş bölgələrində olan dəhşəti çox böyük ustalıqla lentə alaraq bütün dünyaya çatdırmağı bacarmışdı. 1994–1995-ci ildə apardığı çəkilişlər Çeçenistanda baş verənlərin beynəlxalq ictimaiyyətə dolğun şəkildə çatdırılmasında mühüm rol oynayıb.

 

Fərhad Kərimov 1995-ci il mayın 21-də Çeçenistanda çeçen üsyançılar tərəfində xidməti vəzifəsini yerinə yetirərkən naməlum şəraitdə güllələnərək həlak olub. Onun cəsədini mayın 22-də yerli sakinlər tapıb. Bir neçə gün sonra isə qardaşı tərəfindən cəsədə baxış zamanı onun Fərhad Kərimov olduğu rəsmi şəkildə təsdiq edilib.

 

Fərhad Kərimov Qroznı şəhərindən 44 km cənub istiqamətdə yerləşən Nojayurd rayonunun Şuan kəndində dəfn olunub. Yalnız üç ildən sonra Fərhad Kərimovun dostlarının köməyilə onun cənazəsi vətənə gətirilərək Xırdalan qəbirstanlığında, atasının yanında yenidən torpağa tapşırılıb.

 

1996-cı ilin mayında Fərhad Kərimovun adı 934 şəhid jurnalistin şərəfinə Vaşinqtonun Arlinqton milli qəbiristanlığında ucaldılmış memorial abidəyə həkk olunub.

 

Yusif Mamedov