Tarixdə bu gün-Nadir İbrahimovun doğum günü

Bölmə: Araşdırma › ,
Tarix: 21:53 28.12.2023

Bu gün Azərbaycan astronomu və astrofizikçisi Nadir İbrahimovun doğum günüdür.

 

Nadir İbrahimov 1932-ci ildə Qubada anadan olub. Misgər ailəsində böyüyən Nadir uşaq yaşlarından elmə maraq salmağa başlayıb. O, 1956-cı ildə Azərbaycan Dövlət Universitetinin (indiki BDU) fizika fakültəsini bitirərək Şamaxı Astrofizika Rəsədxanasında işləyib. Rəsədxanada əsasən Mars planetinin atmosferinin tədqiqi ilə məşğul olan Nadir elə bu mövzuda da dissertasiya müdafiə edir. Nadir İbrahimovun əhəmiyyətli elmi işlərindən biri Venera planetinin qaranlıq tərəfinin spektrini almaq və şüalanma xətlərinin varlığını göstərmək olub. O, həmçinin Yupiterin atmosferində ammonium və hidrogen qazlarının miqdarını təyin edib, Saturnun spektrində metan qazına məxsus zəif udulma xətlərini aşkar edərək, Uran və Neptunun spektrində isə hələlik heç bir xətlə eyniləşdirilməmiş udulma zolaqlarının olduğunu müəyyənləşdirib. 

 

Bəhram Basqallıya görə O, kəşfləri ilə dünya elminə böyük töhfələr verib. Nadir İbrahimov 1977-ci il yanvarın 1-də ürək çatışmazlığından vəfat edib. Ölümündən 5 il sonra, 1982-ci ilin avqust ayında Beynəlxalq Astronomiya İttifaqının Yunanıstanın Patras şəhərində keçirilən Baş Assambleyasında Mars səthindəki kraterə onun adı verilib.

 

Yusif Mamedov