Xarici dillər üzrə fəlsəfə doktoru imtahanının nəticələri elan olunub -RƏY

Bölmə: Sosial › ,
Tarix: 21:43 13.03.2024

Məlum olduğu kimi Fevralın 18-də doktorantura və dissertanturada təhsil alan və ya təhsilini bitirmiş iddiaçıların xarici dillər üzrə fəlsəfə doktoru imtahanı (fevralın 19-da əcnəbilər üçün Azərbaycan dili imtahanı) keçirilib. Martın 4-də isə iddiaçıların danışıq bacarıqları yoxlanılıb. İmtahan nəticələri bu gün elan olunub.

 

İmtahan nəticələri ilə bağlı "informator.az"a açıqlamasında elm və təhsil eksperti Elçin Əfəndi bu ilki nəticələrin ötən illərlə müqayisədə daha yaxşı olduğunu söyləyib:

 

"İmtahan verməyə hazırlaşan namizədlər müvafiq olaraq xarici dil biliklərini inkişaf etdirirlər. Bu da özünü imtahan nəticələrində daha açıq şəkildə göstərir. Ötən illərdə namizədlər iradlar bildirirdisə, bu il hələki tutarlı və ciddi iradlar görmürük. Daha çox sevinən tərəfləri görürük, çünki onlar nəticələrindən məmnundurlar. Ədəbiyyatlar əsasən ingilis dilindədir məhz tədqiqat işləri aparan şəxslərin müvafiq məqalələrini, tədqiqat işlərini beynəlxalq səviyyədə nəşr etmələri üçün ingilis dili biliyinin olması vacibdir".

 

Zəhra Həsənova