"Azərbaycanın beynəlxalq nüfuzu əməkdaşlıq imkanlarını artırır"

Bölmə: Siyasət › ,
Tarix: 21:31 03.03.2025

Azərbaycanın beynəlxalq aləmdə nüfuzunun artması müxtəlif ölkələrlə əməkdaşlıq imkanlarını genişləndirir.

 

 Siyasi şərhçi Tural İrfan “İnformator.az”a müsahibəsində bildirib ki, ölkəmiz inkişaf etdikcə, dünyada tanındıqca, söz sahibi olduqca əməkdaşlıq etmək istəyən dövlətlərin sayı artmaqdadır: 

 

"Bir çox ölkələr Azərbaycanla müxtəlif sahələrdə əməkdaşlıq etmək üçün maraqlıdırlar. Əsasən Afrika ölkələrinin ölkəmizə diqqət və marağı həm onlar üçün, həm də Azərbaycan üçün önəmli mahiyyət kəsb edir. Bir çox Afrika ölkələri Fransa kimi bəzi Avropa dövlətlərinin uzun müddət istismarında olub, istila edilib, uzun illər müstəmləkə olaraq inkişafdan geri qalıblar. Amma müasir dövrdə bu ölkələrin çoxu müstəqil siyasət aparır, müstəqil münasibətlər qurmaq üçün dost və maraqlı dövlətlərlə müxtəlif sahələrdə əlaqələr qurular. Qvineya - Bisau da bu ölkələrdəndir. Bir çox sahələrdə, siyasi, iqtisadi, təhsil və başqa əhəmiyyətli yönlərdə bu ölkə ilə münasibətlərin olması önəm kəsb edir. 

Prezidentlərin görüşdə ölkələrimiz arasında ilk növbədə təhsil sahəsində əməkdaşlıq məsələsinə toxunulub, Qvineya-Bisaudan olan müxtəlif sahələrə aid mühəndislərin, tibb sahəsi üzrə mütəxəssislərin hazırlanmasına dəstək və təqaüdlərin verilməsi ilə bağlı fikir mübadiləsi aparılıb”.

 

Siyasi şərhçi Azərbaycan və Qvineya-Bisau arasında inkişaf edən əlaqələri dəyərləndirib:

 

“Azərbaycan Respublikasının Prezidenti cənab İlham Əliyev qeyd edib ki, Azərbaycan Qoşulmama Hərəkatına və İslam Əməkdaşlıq Təşkilatına üzv ölkələrə qrantlar ayıraraq bu sahədə öz dəstəyini göstərir. Bu xüsusda, Qvinea-Bisaudan olan tələbələrə də qrantların verilməsi məsələsi müzakirə olunub. Təhsil sahəsində bu kimi əməkdaşlığın vacib olmasının hər iki ölkə üçün maraq dairəsində olduğu məlumdur. 

Həmçinin prezidentlər arasındakı söhbət zamanı ölkələrimiz arasında iqtisadi-ticari əlaqələrin genişləndirilməsi və bununla bağlı nümayəndə heyətlərinin qarşılıqlı səfərlərinin təşkili, həmçinin xarici işlər nazirləri vasitəsilə siyasi məsləhətləşmələrin aparılması məsələlərinə də toxunulub. Görünür ki, bu ölkə ilə Azərbaycan arasında inkişaf mərhələsinə qədəm qoyan əlaqələr zaman çərçivəsində daha yaxın və sıx müsbətlərə qədər yüksələcəkdir. Ölkəmizin kiçikdən böyüyə bütün dünya ölkələri ilə müxtəlif sahələr üzrə əlaqələri, münasibətlərin inkişafı, ortaq layihələr və müqavilələr şəklində sürətlə irəliləyir ki, bu da dövlətimizə sayğı, hörmət və aparılan dövlət siyasətinin nəticəsinin göstəricisidir”.

 

Xanım Ağamalıyeva