"Hind mediasının Bakı və Ankara barədə yaydığı məlumatlar əfsanədir"

Bölmə: Siyasət › ,
Tarix: 20:37 04.03.2025

Hind mediası yazır ki, guya Bakı və Ankara hərbi əməliyyatlara hazırlaşır. Hind mediasının iddiasına görə, Bakı və Ankara Zəngəzurə hərbi müdaxilə edəcək və dəhlizi bu yolla açacaq. Ermənistan baş naziri və xarici işlər nazirləri bölgədə hansısa hərbi eskalasiyanın gözlənilmədiyini deyir. 

 

Mövzu ilə bağlı ‘’informator.az’’a açıqlamasında siyasi şərhçi Elşad Həsənov bildirib ki, bütün bu deyilənlər əfsanədir və boşdur:

 

"Son günlər Rusiya-Ukrayna müharibəsinin getdiyi dövrdə, düzgün olmayan xəbərlər yayılır. Bu da informasiya müharibəsinin bir növüdür. Bu məlumat Ukraynanın Kəşfiyyat İdarəsində yayılıb. Guya, Azərbaycan və Ermənistan arasında müharibə baş verəcək və Ukraynaya da münasibətlər pisləşəcək, Rusiyaya ikinci cəbhə açılacaq və s. Bütün bu deyilənlər əfsanədir və boşdur. Hind mətbuatında da belə məlumatların yayılması onu göstərir ki, həmin mənbələr informasiya müharibəsini daha geniş şəkildə aparmağa çalışırlar. Həm də Hindistan Ermənistana silah-sursat satır. 2024-2025-ci illərdə Ermənistan 600 milyon dollarlıq Hindistandan silah-sursat alacaq. Əvvəllər Ermənistan bildirirdi ki, onlar müdafiə silahları alırlar, amma indi məlumdur ki, bu silahların içərisində hücum silahları da var. Ermənistan öz ağalarının göstərişi ilə, xüsusən də, Fransanın istəyi ilə silahlanır. Ona görə də Ermənistan özünü sığortalamaq üçün belə səhv məlumatların yayılmasında maraqlıdır. Bu məlumatların yayılmasında Fransanın da böyük rolu var. Həmin qüvvələr Cənubi Qafqazı qarışdırmaq istəyirlər. Amma Azərbaycan və Türkiyənin qarşısında Zəngəzur dəhlizini silah yolu ilə açmaq məqsədi yoxdur. Çünki bu, 2020-ci ilin üçtərəfli razılaşmasında var, 9-cu maddədir. Burada da Nikol Paşinyanın imzası var. Azərbaycan bildirir ki, Ermənistan istəsə də, istəməsə də o yol açılacaq. Bu yolun açılmasında İran da bir neçə dəfə özünün ‘’qırmızı xətt’’i olduğunu bildirdi. Amma düşünürəm ki, İran da bu fikrindən dönəcək və bu yol mütləq açılacaq".

 

Siyasi şərhçi qeyd edib ki, biz bu yolu müharibə ilə açmaq istəmirik: 

 

"Azərbaycan öz ərazi bütövlüyünü təmin etdi, ərazisində olan separatçıları çıxardı. Müharibə başa çatdıqdan sonra biz sülh müqaviləsi hazırlayıb, təqdim etdik və onun da çox hissəsi razılaşdırılıb. Amma mütləqdir ki, Ermənistan Azərbaycana ərazi iddiası olan konstitusiyasına dəyişiklik etməlidir. Hesab edirəm ki, onlar 2026-cı ilə ‘’Real Ermənistan’’ konstitusiyasını hazırlayırlar. Bundan sonra isə iki dövlər arasında sülh müqaviləsi imzalanacaq. Ona görə də heç bir eskalasiyanın olacağı gözlənilmir. Bunu Ali Baş Komandan İlham Əliyev də bildirib. Yaxın zamanlarda heç bir eskalasiya gözlənilmir. Eskalasiya o zaman baş verə bilər ki, Ermənistanda olan separatçı qüvvələr yenidən Qarabağ məsələsini qaldıraraq nəyəsə cəhd edərsə, o zaman hesab edirəm ki, Azərbaycan Ordusu Azərbaycana məxsus əzəli-əbədi torpaqlarımızı geri alacaq. Ona görə də hesab edirəm ki, bugünkü Ermənistan rəhbərliyi qətiyyən bu maraqda deyil. Onlar nə qədər silahlandırılsada, başa düşürlər ki, Azərbaycan Ordusu həm say cəhətdən, həm də güc baxımından onlardan qat-qat güclüdür. Bizim ordumuz əliyalın sıldırım qayaları qalxaraq, Şuşanı azad edən ordudur. Ona görə ermənilər heç bir cürətlə bizim torpaqlarımıza yaxın gələ bilməzlər".

 

Günel Verdiyeva