Moskva Yaponiya XİN başçısının Rusiyaya girişinə qadağa qoyub

Bölmə: Siyasət › ,
Tarix: 20:42 04.03.2025

Rusiya Yaponiyanın xarici işlər naziri Takesi İvaya da daxil olmaqla 9 Yaponiya vətəndaşının ölkəyə girişini qadağan edib.

 

Mövzu ilə bağlı beynəlxalq münasibətlər üzrə ekspert, siyasi şərhçi Əli Əzizbəyli "informator.az"a açıqlamasında bildirib ki, Rusiya ilə Yaponiyanın tarixi baxımından ciddi problemləri var:

 

"Məsələn, SSRİ dönəmində Kuril adalarının işğal olunması faktı mövcuddur və uzun müddətdir ki, Yaponiya bu adaların geri qaytarılmasına çalışır. Bununla yanaşı, Yaponiya Uzaq Şərqdə Qərbin əsas müttəfiqi sayılır və Çinə qarşı Rusiyaya qarşı əsas güc mərkəzi hesab olunur. Rusiya ilə hazırkı vəziyyətdə münasibətlərin korlanmasının əsas səbəbi, Rusiyanın Ukraynaya hücumundan sonra Qərbin elan etdiyi sanksiyalar oldu. Yaponiya öz müttəfiqlərinin yanında yer alaraq Rusiyaya qarşı tətbiq edilən sanksiyalara da qoşuldu. Bu sanksiyalar logistika, nəqliyyat, bank sektoru kimi sahələri əhatə edərək Rusiyaya ciddi zərbə vurdu. Buna cavab olaraq, Rusiya bir sıra şəxslərə, o cümlədən Xarici İşlər Nazirliyinə 2022-ci ildən etibarən sanksiya tətbiq edir ki, bu da ikitərəfli əlaqələrə mənfi təsir göstərir".

 

Müsahib qeyd edib ki, bu vəziyyət ticarət və iqtisadi əlaqələrdə ciddi problemlər yaradır. Lakin bu, daha çox Ukrayna müharibəsi ilə bağlıdır. Gələcəkdə Birləşmiş Ştatlarla Rusiyanın kəskin konfliktə, hətta silahlı münaqişə vəziyyətinə çatacağı halda, Yaponiya Amerikanın sırasında dərhal yer tuta bilər və Rusiyaya qarşı həmişə mövqe almağa hazırdır.

Aydan Quliyeva