Azərbaycan-Qazaxıstan nümayəndələri görüşdə nələri müzakirə edəcək?-Politoloq AÇIQLAYIR

Bölmə: Siyasət › ,
Tarix: 21:19 04.03.2025

Martın 3-də Azərbaycan Baş naziri Əli Əsədov onun dəvəti ilə Bakıda rəsmi səfərdə olan Qazaxıstanın Baş naziri Oljas Bektenovla görüşüb.

 

Mövzu ilə bağlı politoloq Samir Hümbətov “informator.az”a açıqlamasında bildirib ki, Qazaxıstanla Azərbaycan arasında əlaqələr bir neçə istiqamətdədir:

 

“Birinci siyasi istiqamətdir. Tərəflər həm SSRİ, həm də indiki dövrdə bir çox siyasi təşkilatlarda birgə təmsil olunurlar. İkili əlaqələr, diplomatik nümayəndələr mövcuddur. Qarşılıqlı şəkildə fəaliyyət göstərirlər. 

İqtisadi əlaqələr:

 Qazaxıstan nefti son iki ildir ki, Azərbaycan Bakı-Tiflis-Ceyhan üzərindən dünya bazarlarına nəql olunub. Eyni zamanda son 2024-cü il statistikasında Azərbaycan və Qazaxıstan ticarət dövriyyəsi yarım milyardı ötüb. Yəni tərəflər arasında siyasi, iqtisadi əməkdaşlığın dərinləşdirilməsi həyata keçirilir. Qazaxıstan və Azərbaycan bir yol layihəsinin ortaq koridorunun üzərində yerləşirlər. Bu da xüsusi əhəmiyyət daşımaqdadır. 

 

Qazaxıstan və Azərbaycan arasında tarixi bağlar da var. Bu tarixi bağlar hər iki dövlətin təkcə hökümətlər arasında deyil, həm də xalqlar arasında bir əlaqənin getdikcə daha da dərinləşməsinə təkan verir. Uzun müddət ərzində əgər Azərbaycan və Qazaxıstan mövcud potensialı daha da artırmaq istəsələr, bu istiqamətdə doğru konsepsiya irəli sürərsə, hər iki dövlətin gələcək prespektivləri yuxarıdır. Bu görüşdə əsas müzakirə mövzusu siyasi, iqtisadi , hərbi təhlükəsizlik sahəsində əməkdaşlığın artırılması və s. müzakirələr aparıla bilər. Yeni dünya reallığında bu cür səfərlərin mütəmadi hal alması kifayət qədər vacib əhəmiyyət daşıyır”. 

 

Kəmalə Vəliyeva