İsrail və HƏMAS arasında atəşkəs təhlükə altındadır
Bölmə: Siyasət ›
,
Tarix: 21:41 04.03.2025
HƏMAS bütün girovların azad edilməsi şərtini qəbul etməsə, İsrail 10 gün ərzində Qəzzada hərbi əməliyyatları bərpa edə bilər. Bu, bölgədə gərginliyin artmasına və humanitar böhranın dərinləşməsinə səbəb ola bilər.
Məsələ ilə bağlı siyasi şərhçi Həşim Səhrablı “İnformator.az”a müsahibəsində bildirib ki, İsrailin hücumları bərpa etmə ehtimalı, atəşkəs danışıqları aparıldığı dövrdə də mövcud idi:
" Yəni, atəşkəs razılaşması imzalanmamışdan əvvəl də bu məsələ gündəmdə idi. Atəşkəs razılaşması əldə olunsa belə, tərəflərdən biri daha çox tələb irəli sürəcək və nəticədə bu razılaşma pozulacaq, hərbi əməliyyatların yenidən başlama ehtimalı yaranacaq. Yəni, həm İsrailin, həm də HƏMAS-ın hərbi münaqişəyə hazırlaşdığı atəşkəs müddətində və ondan əvvəl də müşahidə olunurdu. Bunun əsas səbəbi münaqişənin tam başa çatmamasıdır. Atəşkəsin olması hələ sülhün əldə edildiyi anlamına gəlmir. Sülh yoxdursa, münaqişə davam edir və konkret razılaşma olmadığı üçün tərəflər arasında gərginlik qalır. Beləliklə, bir tərəfin digərinə üstünlük qazanmaq istəyi aktual olaraq qalır.
Bu gün də İsrail tərəfi hərbi imkanlarını səfərbər etməklə göstərir ki, istənilən an hərbi əməliyyatları bərpa edə bilər. Xüsusilə də Donald Trampın ABŞ-də prezident seçilməsindən sonra İsrail tərəfi bu mövqeyində daha da cəsarətlənə bilər. Çünki məlumdur ki, Tramp mahiyyət etibarilə İsrailin sərt tələblərini dəstəkləyən bir siyasət yürüdür və müxtəlif formalarda İsrailə açıq dəstək verir. Buna görə də hazırda İsrailin qarşısını kəsəcək ciddi bir maneə olmadığı üçün ehtimal etmək olar ki, İsrail daha çox tələb irəli sürsün. Əgər bu tələblər yerinə yetirilməsə, yaxın zamanda yeni hücumların baş verməsi mümkündür”.
Siyasi şərhçi münaqişənin alovlanmasının bölgədə böyük dağıntılara və insan itkilərinə səbəb ola biləcəyini bildirib:
“Hərbi əməliyyatlar bərpa olunarsa, bu, qaçılmaz olaraq daha böyük dağıntılara və ciddi fəsadlara səbəb olacaq. Bölgədə həm infrastruktur, həm də mülki obyektlər yeni-yeni dağıntılarla üzləşə bilər. Mülki və ya hərbi obyekt olmasından asılı olmayaraq, çox sayda insan həyatını itirəcək. Yaxın Şərqin ümumi geosiyasi sabitliyi daha da pozulacaq və vəziyyət getdikcə daha xaotik xarakter alacaq. Bu isə gələcəkdə münaqişənin eskalasiyası nəticəsində qonşu ölkələrə də təsir göstərə bilər. Çünki Suriyada tam sabitlik hələ də təmin olunmayıb, İraqda da vəziyyət qeyri-müəyyəndir. Mərkəzi hakimiyyət tam nəzarəti ələ ala bilmir. Bu isə qruplararası qarşıdurmaların, xüsusilə Fələstin məsələsindən sonra, daha da artmasına və silsilə şəkildə bir-birini izləyən gərginliklərə yol aça bilər”.
Xanım Ağamalıyeva
