Rusiya Ukraynanın Donetsk və Luqansk vilayətlərininin işğalını başa çatdırmağa hazırlaşır

Bölmə: Siyasət › ,
Tarix: 22:08 04.03.2025

Bu barədə Ukrayna Müdafiə Nazirliyinin Hərbi İnkişaf İdarəsinin rəis müavini general-mayor Vadim Skibitski məlumat verib. Bu açıqlama Rusiya-Ukrayna müharibəsinin dayanmasının hələ mümkün olmayacağındanmı xəbər verir?

 

Mövzu ilə bağlı “İnformator.az”a açıqlamasında politoloq Əli Mustafa bildirib ki, hücumun davam etdirilməsi o deməkdir ki, Rusiyanın hələdə müharibəni yekunlaşdırmaq fikri yoxdur:

 

“Bugün dünyada baş verən proseslər, xüsusilə müharibələr daha çox hibrid müharibələrdir. Burada təbii ki, psixoloji, hərbi, informasiya, kiber, kəşfiyyat və digər müharibələr var. Hər halda Rusiya tərəfin bu açıqlaması psixoloji müharibə kimi qəbul edilməlidir. Lakin eyni zamanda Rusiya öz hədəflərini göstərir. Bu açıqlama rəsmi şəxsin açıqlamasıdır və o demək istəyir ki,biz hücumu və işğalı davam etdirəcəyik. Hücumun davam etdirilməsi o deməkdir ki, Rusiyanın hələ də müharibəni yekunlaşdırmaq fikri yoxdur. Bildiyimiz kimi Luqanskın bir hissəsi,Donetskin isə böyük bir hissəsi Ukraynanın nəzarəti altındadır. Deməli bu əraziləridə onlar ələ keçirməyə çalışacaqlar. Amma başqa bir maraqlı məqam ortaya çıxır. Bugünlərdə Tramp da bəyan etdi ki, Rusiya tərəfi sülh, Ukrayna tərəfi isə müharibə istəyir. Bu açıqlamadan isə aydın görünür ki Rusiya barışıq yox, müharibə istəyir. Bu informasiya Rusiyanın əleyhinə pr kimi istifadə oluna bilər. Rusiya bu məlumatı yayarkən, bunun ona qarşı istifadə olunacağını nə qədər nəzərə alıb deyə bilmərik, lakin Ukrayna tərəfi bunu dünyaya göstərərək Rusiyanın işğalçı olduğunu bir daha təsdiq edəcəkdir. Bütün hallarda gerçəklik ondan ibarətdir ki, Rusiya savaşı davam etdirməkdə israrlıdır”.

 

Fidan Fərhad