Ermənistan Spikerindən Eskalasiya Riski və Kommunikasiyalar

Bölmə: Siyasət › ,
Tarix: 21:26 05.03.2025

Ermənistan parlamentinin spikeri Alen Simonyan Azərbaycan-Ermənistan münasibətlərindən danışıb. O bildirib ki, hazırda eskalasiya riski var, buna səbəb olacaq fürsətlərin qarşısının alınması üçün hər şey edilməlidir. Onun sözlərinə görə yaxın günlərdə maraqlı hadisələr ola bilər. Simonyan deyib ki, kommunikasiyaların açılması məsələləri müzakirə olunur və Azərbaycana cavabımız bu həftə ərzində ola bilər. 

 

Mövzu ilə bağlı ‘’informator.az’’ açıqlamasında politoloq Oqtay Qasımov bildirib ki, Ermənistan bəzi məsələləri uzatmaqla məşğuldur, bu da gələcək gərginliklər üçün baza rolunu oynaya bilər:

 

"Alen Simonyanın ‘’eskalasiya riski var’’ sözləri ondan qaynaqlanır ki, Azərbaycanla Ermənistan arasında həll edilməmiş bir çox məsələlər var. Onlardan biri də kommunikasiyaların açılması məsələsidir. Bu məsələ ilə bağlı Ermənistan tərəfi manipulyasiyaları davam etdirməkdədir. Paşinyanın açıqlamaları da bunu göstərir. Kommunikasiyaların açılması ilə bağlı Azərbaycanın mövqeyi sadə və birmənalıdır: Azərbaycan vətəndaşlarının, yüklərin və nəqliyyat vasitələrinin Zəngəzur dəhlizindən təhlükəsiz və maneəsiz, yoxlamaya məruz qalmadan keçidinin təmin olunmasıdır. Ermənistan isə bunu müxtəlif variantlarla manipulyasiya etməyə çalışır".

 

Politoloq onu da qeyd edib ki, eskalasiya riski yaradan səbəblərdən biri Ermənistanın sürətlə silahlanması və sərhədboyu müəyyən təxribat cəhdlərinin olmasıdır:

 

"Bunların sülh müqaviləsi imzalanmadan həyata keçirilməsi müəyyən eskalasiya riskini ortaya qoyur. Bundan başqa, Aİ-nın cəsus şəbəkəsinin şərti sərhədlər boyunca hərəkətlərini və Azərbaycan ərazilərini binoklla müşahidə etməsi də eskalasiyaya səbəb olacaq fakt olaraq qiymətləndirilir. O baxımdan, Azərbaycan öz ərazi bütövlüyünü və suverenliyini tam təmin etsədə, hələlik həll edilməyən müəyyən məsələlər qalır ki, bu da o deməkdir ki, sülh müqaviləsi imzalanmayana qədər Azərbaycan və Ermənistan arasında bəzi risklər qalacaq. Azərbaycan Ermənistana bir çox məsələlərin həll edilməsini, konstitusiyanın dəyişilməsini, ATƏT-in Minsk qrupunun ləğv edilməsi məsələlərini təklif edir. Ermənistan isə bu məsələləri uzatmaqla məşğuldur. Bu da gələcək gərginliklər üçün baza rolunu oynaya bilər".

 

Günel Verdiyeva