Ermənistanın öhdəliklərindən boyun qaçırması və Azərbaycanın strategiyası

Bölmə: Siyasət › ,
Tarix: 21:28 05.03.2025

"Otuz ilə yaxın müddətdə Azərbaycanın beynəlxalq səviyyədə tanınmış suveren ərazilərini işğal altında saxlayıb, Azərbaycanın Naxçıvan Muxtar Respublikasının blokadaya düşməsinə səbəb olan Ermənistanın 44 günlük Vətən müharibəsindən sonrakı 4 ildə də kommunikasiyaların açılması üzrə real danışıqlar prosesinə müsbət töhfə vermədiyi hər kəsə məlumdur".

 

Bu sözlər Xarici İşlər Nazirliyinin mətbuat katibi Ayxan Hacızadənin “Armenpress” xəbər agentliyində Ermənistanın baş nazirinin kommunikasiyalara dair dərc olunan məqaləsi ilə bağlı yerli medianın sualına cavabında yer alıb.

 

Azərbaycanın qərb bölgələrini Naxçıvanla birləşdirən kommunikasiyaların açılması məsələsi ilə bağlı Ermənistan yazılı təsbit olunan və imzalanan öhdəliklərinin mövcud olduğunu bilsə də, onları indiyədək yerinə yetirməyib. Ermənistan tərəfi həqiqətən də bölgədə kommunikasiyaların açılmasında maraqlıdırsa, öhdəliklərindən boyun qaçırmamalı və bölgədəki yeni reallıqlara uyğun şəkildə kommunikasiyaların açılması istiqamətində praktiki addımlar atmalıdır.

 

Bu barədə politoloq Sultan Zahidov “İnformator.az”a açıqlamasında bildirib ki, Azərbaycan Ermənistana 2022-ci ilin noyabrında üç tərəfli bəyanatında, bu maddənin salınmasına vadar etməmişdi:

 

“9-cu maddədə qeyd olunur ki, Azərbaycanın qərb rayonları ilə maneəsiz keçid təmin olunmalıdır. ”Zəngəzur dəhlizi” həm Naxçıvan Muxtar Respublikasını ermənilərin blokadasından qurtaracaqdı, həm də Azərbaycan - Türkiyə arasında kommunikasiya xəttlərinin diversifkasiyasına şərait yaranacaqdı, bütün Cənubi Qafqaz dövlətlərinin əməkdaşlığına vəsilə olacaqdı və nəhayət Avrasiya daxilində şərq - qərb marşrutlarının daha da inkişaf etdirilməsinə, yük tutumunun artırılmasına vəsilə olacaqdı”.

 

Ekspertin sözlərinə görə, “Zəngəzur dəhlizi” bizlə orta dəhlizin tərkib hissəsi kimi olsa idi, bu zaman bütün Avrasiya qazanacaqdı:

 

“ Ermənilər yeni bir layihə ortaya çıxararaq, diqqəti “Zəngəzur dəhlizi” mövzusundan fərqli istiqamətə çəkməyə çalışır. Ermənistan tərəfindən dəmir yolunun inşası və müəyyən sadələşdirilmələrin həyata keçirilməsi ilə bağlı təkliflər gəlsə də, bunlar məqbul deyil. Çünki bu zaman maneəsiz və təhlükəsiz keçidin təmin olunması lazımdır”.

 

Son olaraq politoloq bildirib ki, Ermənilər bu yaxınlarda İrəvan, Naxçıvan və Mehriyə dəmir yolu xəttlərinin təmin edilməsini tələb etdilər:

 

“Lakin sözsüz ki bunlar eyni hal deyil. Çünki bir mövzuda İrandan Ermənistana nəqliyyat təmin olunur digərində isə Azərbaycandan Azərbaycana. Digər tərəfdəndə “Zəngəzur dəhlizi”nin açılmasına İran müsbət cavab vermir. Əgər “Zəngəzur dəhlizi” açılarsa, İranın regiondakı dəyəri azalacaq”.

 

Asiman Vəliyeva