Azərbaycan və BƏƏ XİN başçıları regional təhlükəsizlik məsələlərini müzakirə ediblər

Bölmə: Siyasət › ,
Tarix: 22:11 05.03.2025

Azərbaycanın xarici işlər naziri Ceyhun Bayramov ilə Birləşmiş Ərəb Əmirliklərinin (BƏƏ) xarici işlər naziri Abdullah bin Zayed Əl Nəhyan regional və beynəlxalq təhlükəsizlik məsələlərini müzakirə ediblər.

 

Mövzu ilə bağlı “informator.az”a iqtisadçı Pərviz Heydərov bildirib ki, ölkəmiz ilə Birləşmiş Ərəb Əmirliklərinin (BƏƏ) arasında münasibətlər bir çox ölkələr üçün nümunə ola bilər:

 

“Belə ki, qarşılıqlı dostluq və hörmət prinsiplərinə əsaslanan Azərbaycan-BƏƏ münasibətləri durmadan yüksələn xətt üzrə inkişaf edir, iqtisadi-ticarət tərəfdaşlığı hər il genişlənir. Bu da ondan irəli gəlir ki, ölkələrimiz arasında ticarət, investisiya, energetika, kənd təsərrüfatı və maliyyə sahələrində işbirliyini davamlı olaraq gücləndirmək və genişləndirmək üçün böyük imkanlar mövcuddur. 2023-cü ildə iki ölkə arasında qeyri-neft idxal, ixrac və təkrar ixrac da daxil olmaqla ikitərəfli ticarət dövriyyəsinin ümumi həcmi 1 milyard 641 milyon ABŞ dolları təşkil edib. Düzdür, keçən il bir qədər azalma olub. Lakin, BƏƏ-dən gələn turistlərin sayında artım olub. Cari il ərzindəsə, bir sıra istiqamətlərdə əməkdaşlığın daha da inkişaf edəcəyi gözlənilir. Azərbaycan ilə BƏƏ arasında strateji tərəfdaşlığın inkişafının Cənubi Qafqaz regionunda hansı geosiyasi dəyişikliklərə səbəb ola biləcəyinə gəldikdə isə, ölkəmiz Cənubi Qafqazda liderdir. Və bu üzdən də BƏƏ ilə qarşılıqlı iqtisadi və ticari əlaqələrimiz bütün region üçün əhəmiyyətlidir. Bundan digər ölkələr də fayda götürə bilər. BƏƏ azad iqtisadi zonadır, dünyada ən inkişaf etmiş məkanlardan biridir. Ölkəmiz üçün BƏƏ ilə əlaqələrin sürətli inkişafı olduqca vacibdir”.

Aysel Mirzəyeva