Regionlarda uşaq futbolu-İnkişafın əngəlləri və tələb olunan strategiyalar

Bölmə: İdman › ,
Tarix: 22:32 20.11.2024

"Regionlarla şəhərdəki vəziyyət tamamilə fərqlidir. Futbolun inkişafı üçün zəruri olan idman inventarları (toplar, formalar) və infrastruktur əksər regionlarda mövcud deyil".

 

Bu sözləri "informator.az"a açıqlamasında futbol eksperti Şahin Diniyev söyləyib. Ekspert regionlarda futbolun inkişafına mane olan əsas səbəblərdən də bəhs edib: 

 

"Regionlarda, bir neçə istisna olmaqla (məsələn, Qəbələ və Gəncə), maddi-texniki bazanın çatışmazlığı, stadionların və idman meydançalarının olmaması, uşaq futboluna lazımi diqqətin yetirilməməsi kimi ciddi problemlər var. Maddi dəstək əsasən UEFA tərəfindən ayrılan vəsaitlərlə məhdudlaşır. Bu isə, əsasən, Premyer Liqa klublarına yönəldilir, beləliklə, regionlarda bu dəstəkdən yararlanma imkanları minimuma enir. Premyer Liqada təmsil olunmayan regionlar, uşaq futbolunun inkişafında daha da geri qalır. Bakıda da, demək olar ki, bütün komandaların çoxu Bakıda yerləşdiyi üçün uşaq futboluna qoyulan vəsait də UEFA-dan gələn vəsaitin hesabınadır.  Premyer Liqanın klublarına 3 milyon ödənilir, onlarda bir hissəsi mütləq şəkildə uşaq futboluna xərclənməlidir".

 

Şahin Diniyevin sözlərinə görə, ən vacib addım uşaq futbolunun inkişafına xüsusi diqqətin ayrılmasıdır:

 

"Mövcud problemlər arasında keyfiyyətli məşqçilərin çatışmazlığı, infrastruktursuzluq, inventar təminatının olmaması xüsusilə diqqət çəkir. Bu problemlərin həlli məqsədilə ümumi bir strategiya hazırlanmalı, həmin strategiyada regionlarda uşaq futbolunun inkişafı üçün konkret fəaliyyət planı və prioritetlər müəyyən edilməlidir".

 

Fatimə Abdulrəhimli