İsrail ordusu Qəzzada genişmiqyaslı hərbi əməliyyat başlatdı

Bölmə: Dünya › ,
Tarix: 22:06 21.01.2025

İsrail ordusu Qəzzada atəşkəsdən iki gün sonra işğal altında olan İordan çayının qərb sahilindəki Cenin şəhərində genişmiqyaslı hərbi əməliyyat başlatdı.

 

Baş nazir Benyamin Netanyahu “Dəmir Divar” adlanan bu əməliyyatın Cenin şəhərində terroru aradan qaldırmaq məqsədilə həyata keçirildiyini bildirdi.

 

Əməliyyat zamanı ən azı səkkiz fələstinli öldürülüb, 35 nəfər yaralanıb.

 

İsrail hərbi qüvvələri şəhəri mühasirəyə alıb və qaçqın düşərgəsini ağır texnika və snayperlərdən istifadə edərək hədəfə alıb. Fələstinin xəbər agentliyi Wafa, İsrail təyyarələrinin Cenin şəhərini bombaladığını və təcili yardım maşınlarının şəhərə girişinin qarşısının alındığını bildirib.

HƏMAS və digər silahlı qruplaşmalar İsrailə qarşı müqaviməti artırmağa çağırıb. Bununla yanaşı, Fələstinin Səhiyyə Nazirliyi Cenin şəhərində əməliyyatlar nəticəsində çoxsaylı yaralanmalar olduğunu təsdiqləyib.

 

İsrailin son aylar ərzində İordan çayının qərb sahilində şiddətli əməliyyatları artıb və bu bölgədə İsrail hərbi qüvvələri ilə fələstinlilər arasında toqquşmalar tez-tez baş verir. BMT-nin İnsan Haqları Ofisi bu zorakılıqlardan narahat olduğunu bildirib.

 

Mənbə :CNN News 

Aydan Quliyeva