Tarixə düşəcək təklif hazırlandı-Tam 1 milyard avro!
Bölmə: İdman ›
,
Tarix: 21:41 27.02.2025
“The Telegraph” qəzetinin məlumatına görə, Səudiyyə Ərəbistanı Dövlət İnvestisiya Fondu (PIF) “Real Madrid”in ulduz futbolçusu Vinisius Junior üçün tarixi bir təklif hazırlayır. PIF, Səudiyyə Ərəbistanının aparıcı klubları olan “Al-Nassr”, “Al-Ittihad”, “Al-Hilal” və “Al-Ahli”nin əsas səhmdarıdır. Transfer baş tutarsa, Vinisiusun hansı kluba qoşulacağı sonradan müəyyən ediləcək.
Məlumata görə, Səudiyyə Ərəbistanı yay aylarında “Real Madrid” ilə danışıqlara başlayaraq, braziliyalı ulduz üçün təxminən 240 milyon avro transfer haqqı təklif etməyi planlaşdırır. Üstəlik, bu məbləğə əlavə bonus ödənişləri də daxil ediləcək.
Əgər bu transfer reallaşarsa, Vinisius Junior, 2017-ci ildə “Paris Saint-Germain”in “Barcelona”ya Neymar üçün ödədiyi 222 milyon avroluq məbləği keçərək, futbol tarixinin ən bahalı oyunçusu olacaq.
Səudiyyə Ərəbistanının Vinisiusa marağı yeni deyil. 24 yaşlı ulduzun Səudiyyə Pro Liqasına transfer olacağı ilə bağlı şayiələr aylardır gündəmdədir.
Səudiyyə Ərəbistanı, Vinisiusa misli görünməmiş bir müqavilə təklif etməyi planlaşdırır. İddiaya görə, braziliyalı ulduz illik 200 milyon avro qazanacaq və beş illik müqaviləsi boyunca ümumilikdə 1 milyard avro gəlir əldə edəcək.
Mənbə: beinsports
Aytac Mustafayeva
