ABŞ-İran danışıqları üçün yeni təkliflər

Bölmə: Dünya › ,
Tarix: 16:45 20.06.2025

ABŞ ilə İran arasında danışıqların bərpası ehtimalı gündəmdə olduğu bir vaxtda, bir sıra Avropa ölkələri, eləcə də Türkiyə və Oman bu prosesə ev sahibliyi etməyə hazır olduqlarını bildiriblər.

 

Diplomatik mənbələrdən əldə edilən məlumatlara əsasən, Türkiyə, Oman, İtaliya və Norveç daxil olmaqla bir neçə ölkə, əgər İran danışıqlar üçün bu marşrutu seçərsə, birbaşa və ya dolayı şəkildə keçiriləcək görüşlərə ev sahibliyi etməkdə maraqlıdır.

 

Bununla yanaşı, Yaxın Şərqdəki mövcud diplomatik vəziyyətin mürəkkəbləşdiyi vurğulanır. Bildirilir ki, İsrailin İrana qarşı həyata keçirdiyi son hücumlar fonunda İran rəsmiləri ilə əlaqə qurmaq əvvəlki dövrlərlə müqayisədə xeyli çətinləşib.

 

Bəzi müşahidəçilərə görə, artan diplomatik təşəbbüslər danışıqların yenidən başlaması üçün şərait yarada bilər. Lakin gərginlik davam etdiyi müddətcə tərəflər arasında hər hansı irəliləyişin baş verməsi asan görünmür.

 

Mənbə: Caliber

Aytən Ağazadə