Ukraynaya əlavə "Patriot" sistemləri göndərilib

Bölmə: Dünya › ,
Tarix: 21:18 14.07.2025

ABŞ Prezidenti Donald Tramp Ukraynaya əlavə “Patriot” zenit-raket komplekslərinin tədarük olunduğunu bəyan edib.

 

“Avropa Həqiqəti”nin məlumatına görə, Tramp bu barədə bazar ertəsi NATO-nun Baş katibi Mark Rutte ilə görüşdən sonra jurnalistlərə açıqlama verib.

 

O bildirib ki, Ukraynaya göstərilən hərbi yardım Avropa dövlətlərinin hesabına həyata keçirilir və bu çərçivədə “Patriot” sistemləri ilə də təminat nəzərdə tutulur:

 

 “Onların bir qismi artıq yoldadır – əslində, bir neçə gün ərzində Ukraynaya çatacaq. ‘Patriot’ sistemlərinə sahib bir neçə ölkə onları müvəqqəti olaraq Ukraynaya verəcək, biz isə həmin ölkələrə əvəzləyici sistemlər göndərəcəyik”, – deyə Tramp izah edib.

 

ABŞ Prezidenti əlavə edib ki, “Patriot” sistemlərini yerləşdirməyə hazır olan bir ölkə var. Həmin ölkənin adı açıqlanmasa da, Tramp qeyd edib:

 

 “Hazırda 17 ədəd ‘Patriot’ sistemini və ya onların əhəmiyyətli hissəsini döyüş meydanına göndərmək üçün razılaşma üzərində işləyirik. Bunu çox qısa müddət ərzində reallaşdırmaq mümkündür”.

 

Mənbə :Caliber 

Aytən Ağazadə