Ermənistanın Sülh Prosesini Uzatmaq Cəhdləri və Sərhəd Delimitasiyası Müzakirələri

Bölmə: Siyasət › ,
Tarix: 20:49 28.02.2025

‘’Sputnik Armenia’’nın yaydığı xəritə məlumatlarına görə 1976-cı ildə ki ərazilərə uyğun delimitasiya aparılacaq. Təxminən, 5,8 km-lik ərazinin Azərbaycana qaytarılacağı iddia edilir və ərazilərin Tavuş istiqamətində olduğu bildirilir. Bu məlumat Ermənistanda qarışıqlığa səbəb olub. 

 

Mövzu ilə bağlı ‘’informator.az’’a açıqlamasında Siyasi və Hüquqi Araşdırmalar Mərkəzinin (SHAM) sədri Xəyal Bəşirov bildirib ki, Ermənistan bütün məsələlərə diqqət yetirməlidir, ciddi düşünməlidir. Proseslərin uzadılması niyyətləri təbii ki, qəbul olunmayacaq: 

 

"Ermənistan tərəfinin bu prosesi uzatması getdikcə yoxuşa xidmət edir. Çünki Ermənistan və Azərbaycan arasında ‘’İkinci Qarabağ’’ müharibəsi 4 ildir ki, bitib. Artıq 5-ci ildir ki, Azərbaycan Ermənistana sülh təkliflərini irəli sürür. 4 ildən çoxdur ki, Ermənistanın ictimaiyyətə sülhün onlar üçün vacib olduğunu çatdırmağa fürsəti var idi. Amma biz gördük ki, Ermənistan tərəfi bunu etmək əvəzinə silahlanır, ATƏT-in Minsk qrupunu qorumağa çalışır, Azərbaycana qarşı düşmənçilik siyasətindən əl çəkmir, üzərinə düşən öhdəliklərdən boyun qaçırmağa cəhd göstərir. Azərbaycan isə bu məsələləri qaldırdıqda, Azərbaycandan vaxt istəməyə çalışır. Bütün bunlar onu göstərir ki, Ermənistan tərəfi prosesi uzadır. Müəyyən uğurlu addımlar da atıldı ki, bunlarda delimitasiya ilə ərazilərin qaytarılması, hərbiçilərin mübadiləsi və s. kimi addımlar atıldı və bu addımlar ikitərəfli danışıqların nəticəsi idi. Bütün bunların dayandırılması Ermənistanın havadarlarından dəstək alması ilə baş verdi. Təbii ki, biz tarixə nəzər yetirsək görərik ki, Ermənistan əraziləri Azərbaycana məxsusdur. Biz istəmirik ki, sülh prosesi uzadılsın, prosesə xələl gətirilsin. Qeyd olunan ərazilərin qaytarılması baş verəcəksə, təbii ki, bu Ermənistanda qarışıqlığa səbəb olacaq. Azərbaycanla Ermənistanı heç bir məsələdə müqayisə etmək olmaz. Ermənistanın hazırki hakimiyyəti özünü qoruyub saxlamağa çalışır və bunun üçün addımlar atır. O baxımdan düşünürəm ki, Ermənistan bütün məsələlərə diqqət yetirməlidir, ciddi düşünməlidir. Proseslərin uzadılması niyyətləri təbii ki, qəbul olunmayacaq".

 

Politoloq onu da qeyd edib ki, sərhəd məsələsi uzun çəkən məsələdir. Azərbaycan və Ermənistan arasında sərhədin uzunluğu 1000 km-dən çoxdur. Biz də bütün bunları bilərək bu prosesə razılıq verdik və qəbul etdik ki, müəyyən bir formada razılaşma ilə biz sülh sazişini, sərhədlərin delimitasiyasını reallaşdıra bilərik. Hər bir halda sərhədlərin müəyyənləşməsi prosesi heç bir maneə olmadan davam edəcəksə, bu da sülh sazişini yaxınlaşdıra bilər.

 

Günel Verdiyeva