Ermənistanda Rusiya Sərhədçilərinin Çıxarılması

Bölmə: Siyasət › ,
Tarix: 20:41 03.03.2025

Ermənistan baş naziri Nikol Paşinyan İran sərhədindən sonra Türkiyə sərhədindən də rusiyalı sərhərçiləri çıxardıb.Bundan əvvəl Ermənistanın Xarici İşlər Naziri Ararat Mirzoyan çıxışlarının birində heç bir təhlükə görülməzsə, Türkiyə sərhədindən rusiyalı sərhədçilərin çıxarıla biləcəyini bildirmişdi. Rusiya sərhədçilərinin Türkiyə ilə sərhəddən çıxarılması Ermənistanda müxtəlif fikirlər yaradıb. 

 

Mövzu ilə bağlı ‘’informator.az’’a açıqlamasında siyasi şərhçi Sultan Zahidov bildirib ki, Ermənistan öz təhlükəsizlik arxitekturasını 180 dərəcə dəyişdirir, Rusiyanın təsir imkanlarını maksimum azaltmağa çalışır:

 

"Əslində, bununla bağlı Ermənistanda uzun müddətdir müzakirələr gedirdi. Demək olar ki, Ermənistan öz təhlükəsizlik arxitekturasını 180 dərəcə dəyişdirir, Rusiyanın təsir imkanlarını maksimum azaltmağa çalışır. Bu bir tərəfdən, Ermənistanın suverenliyi, digər tərəfdəndə Cənubi Qafqazda sülh və sabitliyin təmini baxımından müsbət haldır. Amma məsələ burasındadır ki, Ermənistan Rusiyadan əlini çəksə də, Fransaya yönəlir və Fransa, Aİ regiondaki mövcudluğu regional sülhə, o cümlədən, Azərbaycan-Ermənistan münasibətlərinin normallaşmasına qeyri-konstruktiv təsir göstərir. Aİ müşahidəçilərinin Azərbaycana qarşı apardığı kəşfiyyatçı fəaliyyəti çox yaxşı bilirik. Belə olan halda, Rusiya hərbiçilərinin çıxarılıb, yerinə Avropa hərbiçilərinin gətirilməsi mövcud vəziyyəti daha da gərginləşdirir".

 

Siyasi şərhçi qeyd edib ki, Rusiya sərhədçilərinin çıxarılması Zəngəzur dəhlizi məsələsinə birbaşa təsir etmir: 

 

"Bu dəhliz Azərbaycanla Naxçıvanı birləşdirəcək dəhlizdir. Daha sonra isə Naxçıvan üzərindən Türkiyəyə gedəcək kommunikasiya xəttidir. Amma məsələ burasındadır ki, rusiyalı sərhədçilərin bölgədə olmaması o deməkdir ki, bölgədə Azərbaycan və Türkiyənin təsir gücü artır. Belə olan halda, Ermənistana təzyiq göstərilərək üçtərəfli bəyanatın 9-cu maddəsinə əməl etməsinə nail olmaq olar. 

Sülh sazişinin imzalanmasına maneə olan 2 maddə var. Paşinyanın dediyinə görə, 2027-ci ilə qədər Ermənistan konstitusiyası dəyişdiriləcək və bu maneə aradan qalxacaq. Digəri isə ATƏT-in Minsk qrupunun ləğvidir. Əslində, bu maddədə Azərbaycan və Ermənistanın mövqeləri uyğunlaşır. Sülh sazişində razılaşdırılmayan ən əsas maddə isə sərhəddə üçüncü tərəfin olmamasıdır. Ermənistan isə Aİ müşahidə missiyasının müddətini daha 2 il artırdı. Rusiya sərhədçilərinin çıxması regionda Aİ missiyası olduğu üçün vəziyyəti ciddi şəkildə dəyişmir. Amma istənilən halda, Rusiya artıq regional proseslərə əvvəlki qədər mənfi təsir edə bilməyəcək. Eyni zamanda, Rusiya sərhədçilərinin çıxarılması Türkiyənin təhlükəsizlik maraqlarına təsir edir. Hər nə qədər Türkiyə və Rusiya arasında iqtisadi-ticarət əlaqəsi olsa da, onların arasında tarixi münaqişə vardır. Onların Cənubi Qafqazda və Yaxın Şərqdə maraqları bir-birinə ziddir. Ona görə də düşünürəm ki, Türkiyə Rusiya sərhədçilərinin sərhəddən çıxmasından məmnundur.

 

Günel Verdiyeva