ABŞ və Ukrayna: Müttəfiqlikdən Gərgin Ayrılığa?
Bölmə: Siyasət ›
,
Tarix: 21:01 03.03.2025
Fevralın 28-də Ağ Evdə ABŞ Prezidenti Donald Tramp və Ukrayna Prezidenti Volodimir Zelenski arasında keçirilən görüşdə ciddi gərginlik yaşanıb. Görüşün əsas mövzusu Ukraynadakı müharibənin dayandırılması üçün sülh danışıqları olub. Lakin tərəflər arasında qarşılıqlı ittihamlar və fikir ayrılıqları səbəbindən görüş nəticəsiz başa çatıb. Beləliklə, Tramp və Zelenski arasındakı bu gərginlik, Ukrayna münaqişəsinin həllində yeni çətinliklər yaradıb və beynəlxalq ictimaiyyətin diqqətini cəlb edib.
Məsələ ilə bağlı politoloq Oqtay Qasımov "informator.az"a açıqlamasında bildirib ki, İki gün öncə Vaşinqtonda baş verən hadisələr Ukrayna-ABŞ münasibətlərində ciddi gərginliyə səbəb olub:
"Görüşmə zamanı Amerika tərəfinin göstərdiyi müəyyən təzyiqlər əvvəlcədən qurulmuş ssenariyə bənzəyirdi və bu təzyiq vəziyyəti daha da ağırlaşdırdı. Ukrayna prezidenti Volodimir Zelenski Amerika Birləşmiş Ştatlarına yeraltı zənginliklərlə bağlı anlaşma imzalamaq məqsədilə ABŞ-a səfər etmişdi. Anlaşmanın qarşılığında isə Təhlükəsizlik təminatı almaqla bağlı açıqlama vermişdi. Lakin Amerika Birləşmiş Ştatları anlaşmanı imzalayacağını amma təhlükəsizlik təminatı verməyəcəyini bildirməsi , Zelenskiylə görüşün ilk dəqiqələrindən ona qarşı aşağılayıcı münasibət bəsləməsi və vitse-prezidentin proseslərə yersiz müdaxiləsi Ukrayna-ABŞ münasibətlərinin xeyli gərgin keçəcəyindən xəbər verdi".
Politoloqun söylədiklərinə görə, Amerika Birləşmiş Ştatları Ukraynaya olan dəstəyini kəsməyi düşünsə , bu Ukrayna üçün ciddi problemlər yaradacaq. Avropa ölkələri Ukraynaya dəstək göstərdiklərini ifadə etsələr də eyni zamanda Amerikasız hər hansısa təhlükəsizlik təminatlarının verilməsinin xeyli problematik olacağını da düşünürlər. Həqiqətəndə bu proses belədir. Çünki Avropa uzunmüddət olaraq Amerikanın təhlükəsizlik çətiri altında yaşayıb və hal-hazırkı vəziyyətdə bu təhlükəsizlik çətiri kənara çəkildiyi zaman Avropa ittifaqı Rusiya təhdidi ilə üz-üzə qalacaqdır. Bu isə Avropa üçün ciddi problemlər yarada bilər. Nəticə olaraq Amerikanın mövcud hərəkəti Ukrayna münaqişəsinin həllində çətinliklər yaradacaqdır. Buna görə də, Ukrayna tərəfi Amerika ilə olan münasibətlərdəki təsirləri azaltmaq üçün müxtəlif yollara baş vuracaqdır.
Məryəm Zaliyeva
