Myanma xuntası dağıdıcı zəlzələdən sonra hava zərbələrini davam etdirir

Bölmə: Dünya › ,
Tarix: 15:19 30.03.2025

Myanmadakı hərbi xuntanın 1600-dən çox insanın ölümü ilə nəticələnən güclü zəlzələdən sonra müharibədən zərər çəkən ölkənin bəzi hissələrini bombalamağa davam etdiyi bildirilib. BMT hücumları "tamamilə qəddar və qəbuledilməz" adlandırıb. Xüsusi məruzəçi Tom Andrews BBC-yə deyib ki, zəlzələdən sonra ordunun "insanları xilas etməyə çalışarkən bomba atmağa davam etməsi" inanılmazdır. O, təxminən 4 il əvvəl çevrilişlə hakimiyyəti ələ keçirən hərbi rejimi bütün hərbi əməliyyatları dayandırmağa çağırıb.

 

“Hərbiyə təsiri olan hər kəs təzyiqi gücləndirməli və bunun qəbuledilməz olduğunu açıq şəkildə bildirməlidir”.

“Mən xuntadan bütün hərbi əməliyyatlarını dayandırmasını tələb edirəm”,- o əlavə edib. BBC Birma, Şan əyalətinin şimalındakı Naunqçoda hava hücumu nəticəsində 7 nəfərin öldüyünü təsdiqləyib. Bu hücum yerli vaxtla saat 15:30 radələrində, zəlzələdən üç saat keçməmiş baş verib.

Hərbçiləri hakimiyyətdən uzaqlaşdırmaq üçün mübarizə aparan demokratiya tərəfdarı üsyançı qruplar zəlzələnin episentri olan Saqainq bölgəsinin şimal-qərbindəki Çanq-U şəhərinin havadan bombardman edildiyini bildiriblər. Tailand sərhədinə yaxın ərazilərə də hava zərbələri endirilməsi xəbərləri var. Devrilmiş mülki administrasiyanı təmsil edən Milli Birlik Hökuməti (NUG) bir bəyanatda silahlı qüvvələrinin zəlzələdən zərər çəkmiş bölgələrdə "müdafiə hərəkətləri istisna olmaqla, hücum hərbi əməliyyatları" üçün bazar günündən etibarən iki həftəlik fasilə verəcəyini açıqlayıb.

 

BBC News 

Asiman Vəliyeva