Zəlzələ bölgəsinə 500 milyon dollarlıq xarici maliyyə dəstəyi

Bölmə: Dünya › ,
Tarix: 21:37 01.04.2025

Türkiyə, zəlzələ bölgəsində məşğulluğun qorunması və əlavə iş yerlərinin yaradılması üçün müəssisələrə 500 milyon dollarlıq yeni xarici maliyyə dəstəyi təmin edib. Nazir Şimşək, “Fəlakətin bölgə iqtisadiyyatına mənfi təsirlərini azaltmağa və iqtisadi bərpanı sürətləndirməyə yönəlmiş işlərə önəm veririk”, – deyə bildirib.

 

Xəzinə və Maliyyə Nazirliyindən əldə edilən məlumata görə, Türkiyənin müxtəlif sahələrdə əlverişli şərtlərlə və uzunmüddətli xarici maliyyə təmin etmə səyləri davam edərkən, zəlzələ bölgəsinə yönəldilən maliyyə axını da sürətlə davam edir. Nazirliyin apardığı işlər çərçivəsində zəlzələ bölgəsinə yönəlik “Qeydə Alınmış Məşğulluq Yaratma Layihəsi”nin ikinci mərhələsini Dünya Bankının İcraçı Direktorlar Şurası təsdiqləyib.

 

Sözügedən layihə çərçivəsində Dünya Bankından Türkiyə İnkişaf və İnvestisiya Bankı AŞ-yə (TKYB) Nazirliyin zəmanəti altında 500 milyon dollar maliyyə vəsaiti təmin ediləcək. Layihədən zəlzələlərdən təsirlənənən Adana, Adıyaman, Diyarbakır, Elazığ, Gaziantep, Hatay, Kahramanmaraş, Kilis, Malatya, Osmaniye və Şanlıurfa daxil olmaqla 11 il, həmçinin Batman, Bingöl, Kayseri, Mardin, Niğde, Sivas və Tuncelidən ibarət 7 qonşu il faydalanacaq. Layihə ilə məşğulluğun qorunması və əlavə iş yerlərinin yaradılması məqsədilə bu vilayətlərdə fəaliyyət göstərən KOBİ-lərə və iri miqyaslı müəssisələrə uzunmüddətli maliyyə dəstəyi təmin edilməsi nəzərdə tutulur.

 

Xəzinə və Maliyyə Naziri Mehmet Şimşək də mövzu ilə bağlı qiymətləndirmə aparıb. 6 fevral 2023-cü ildə Kahramanmaraş mərkəzli zəlzələlərdən sonra bölgədə geniş miqyaslı yenidən qurma işlərinin aparıldığını bildirən Şimşək, bunları deyib:

 

“Fəlakətin bölgə iqtisadiyyatına mənfi təsirlərini azaltmağa və iqtisadi bərpanı sürətləndirməyə yönəlmiş işlərə önəm veririk. Bu çərçivədə, başda Dünya Bankı olmaqla, beynəlxalq təşkilatlarla əməkdaşlığımız güclü şəkildə davam etdirilir. Son məqsədi davamlı rifah artımı olan iqtisadi proqramımız çərçivəsində əlavə dəyər yaradan investisiyaların dəstəklənməsi, istehsal və ixracın artırılması, eləcə də məşğulluğun gücləndirilməsi istiqamətində işlərimizə qətiyyətlə davam edilir”.

Mənbə:TRT
Ətirə İbayeva