Bu, Ukraynanın “qırmızı xətt”idir

Bölmə: Siyasət › ,
Tarix: 21:30 04.04.2025

 

Ukrayna Rusiya ilə müharibənin sona çatdırılması üzrə gələcək danışıqlar zamanı Rusiyanın nəzarətində olan əraziləri bu ölkənin əraziləri kimi tanımayacaq və ordusunun kiçildilməsinə razı olmayacaq.

 

Mövzu ilə bağlı politoloq Oqtay Qasımov “İnformator.az”a açıqlamasında bildirib ki, Rusiyanın Ukrayna məsələsi ilə bağlı dediyi təkliflər lazımsızdır:

 

“Bu təkliflər qəbul olunarsa, Ukrayna müstəqil bir dövlət deyil, Rusiyadan asılı dövlət statusunda olacaq. Ukrayna ərazilərinin Rusiyaya verilməsinin qəbul edilməsi, hüquqi cəhətdən tanınması, Ukrayna ordusunun faktiki olaraq tərksilah olunmasının nəticəsi olaraq, Ukraynanı gələcəkdə yeni Rusiya təcavüzü gözləyə bilər və bu hadisənin olmayacağına heç kim təminat verə bilməz. Bu halda Ukraynanın tələbləri qəbul edəcəyini düşünmürəm.

 

Şübhəsizdir ki, Avropa İttifaqı dövlətləri də bu məsələdə maraqlı deyillər. ABŞ-nin məsələyə münasibəti sual doğurur. Çünki Donald Tramp hakimiyyətə gəldikdən sonra Rusiyaya kifayət qədər güzəştli təkliflər edilib. Əgər Rusiya bundan sonra da Trampın təkliflərini qəbul etməyib, prosesləri uzatmağa çalışacaqsa, ABŞ-nin mövqeyində də müəyyən dəyişikliklər ola bilər. İnanmıram ki, Ukraynada seçkilərdə Zelenski və ya başqası hakimiyyətə gəldikdə Rusiyanın bu cür alçaldıcı və qəbuledilməz şərtlərinə razı olsun”.

 

Asiman Vəliyeva