“Tərəflər bir-birinə güzəştə getməyə hazır deyil”-ŞƏRH
Bölmə: Siyasət ›
,
Tarix: 20:51 19.05.2025
Putin Ukraynanın dörd bölgəsinə tam nəzarəti ələ keçirməyi planlaşdırır.
Vladimir Putin əmindir ki, 2025-ci ilin sonuna qədər rus ordusu Kremlin artıq Rusiyanın bir hissəsi elan etdiyi Ukraynanın dörd bölgəsinə tam nəzarəti ələ keçirə biləcək.
Mövzu ilə bağlı politoloq Tural İsmayılov “İnformator.az”a açıqlamasında bildirib ki, Vladimir Putinin Ukrayna müharibəsində güzəştə getməməsi, dörd bölgəyə tam nəzarəti ələ keçirmək niyyəti Rusiya və beynəlxalq münasibətlər üçün geniş nəticələr doğurur:
“Bu mövqe bir neçə istiqamətdə təhlil edilə bilər. Rusiyanın bu strategiyası ölkə daxilində gücün mərkəzləşdirilməsini gücləndirir. Kremlin siyasi mövqeyini daha da sərtləşdirir. Müharibənin uzanması Rusiya cəmiyyətində iqtisadi və sosial təsirləri daha kəskin hiss etdirəcək. Artan sanksiyalar nəticəsində Rusiyanın iqtisadiyyatı yeni çətinliklərlə üzləşəcək. Kreml daxili sabitliyi qorumaq üçün informasiya və təhlükəsizlik mexanizmlərinə daha çox investisiya qoyacaq.
Qərb dövlətlərinin reaksiyası isə gözlənilən istiqamətdə davam edəcək. Yeni sanksiyalar və hərbi yardımın artırılması Rusiyanın müttəfiqlərini, o cümlədən Çin və Hindistanı seçim etməyə məcbur edəcək. NATO-nun Şərqi Avropada hərbi mövcudluğunu artırması və Ukraynaya yeni silah tədarükü müharibənin gedişatına təsir edəcək. Diplomatik həll yolları getdikcə daha mürəkkəbləşəcək, çünki tərəflər bir-birinə güzəştə getməyə hazır deyil”.
Politoloq qeyd edib ki, geosiyasi balansın dəyişməsi beynəlxalq münasibətlərə uzunmüddətli təsir göstərə bilər:
“Rusiya öz nüfuzunu genişləndirmək üçün yeni diplomatik ittifaqlar qurmağa çalışacaq. Lakin Qərbin təzyiqləri bu cəhdlərin effektivliyini məhdudlaşdıra bilər. Ukrayna müharibəsi artıq regional münaqişə deyil, qlobal güclər arasında strateji qarşıdurmaya çevrilir.
Bu prosesin nəticəsi həm Rusiya üçün, həm də dünya üçün yeni siyasi çağırışlar yaradacaq. Gələcək hadisələrin inkişafı Kremlin hərbi uğurlarına, Qərbin koordinasiya olunan cavab tədbirlərinə və beynəlxalq diplomatiyanın effektivliyinə bağlıdır”.
Nuray Əliyeva
