Yasamal rayonunda mənzildə yanğın baş verdi

Bölmə: Hadisə › ,
Tarix: 17:52 27.07.2023

Bu gün saat 11:44-də paytaxtın Yasamal rayonu, Həsən bəy Zərdabi küçəsində yerləşən çoxmərtəbəli binada yanğın baş verib. Dərhal əraziyə Fövqəladə Hallar Nazirliyi Dövlət Yanğından Mühafizə Xidmətinin qüvvələri cəlb olunub. Məlum olub ki, yanğın 19 mərtəbəli yaşayış binasının dördüncü mərtəbəsində yerləşən üçotaqlı mənzilin mətbəxində baş verib. Yanğınsöndürənlərin çevik müdaxiləsi sayəsində yanğın genişlənərək mənzilin digər otaqlarına keçməsinin qarşısı alınaraq qısa müddətdə söndürülüb, həmçinin mənzildəki vətəndaşların təxliyəsi həyata keçirilib. Yanğın zamanı 8 nəfər sakin yanğınsöndürənlər tərəfindən təxliyə edilib. Mənzilin böyük hissəsi yanğından mühafizə edilib.

 

Bina sakinlərinin dediyinə görə, mənzildən qalxan tüstünü dərhal müşahidə ediblər: “Gördük tüstü çıxır, ancaq ev yiyəsi evdə yox idi. Biz tez FHN-ni çağırdıq. Sağ olsunlar onlar da vaxtında gəldilər, nə kömək lazımdır etdik”.

 

Yasamal rayon Dövlət Yanğından Mühafizə Hissəsinin rəisi Rəşad Nəsirov deyir ki, dərhal avtonərdivan vasitəsilə, eləcə də pilləkən qəfəsi ilə yanğının söndürlüməsinə müdaxilə olunub: “12:00-da yanğının tamamilə qarşısı alınıb. 12:02-də isə yanğın tam söndürlüb. Yanğın ümumi sahəsi 112 kv metr olan 3 otaqlı mənzilin 15 kvadrat ümumi sahəsi olan mətbəx hissəində baş verib, ümumilikdə yanan mətbəx mebeli, eynilə qaz sobası və asperator olub. Yanğının söndürlümsi zamanı istər yanğınsöndürənlər, istərsə də sakinlər tərəfindən xəsarət faktı aşkar olunmayıb. Eyni zamanda yanğının mənzilin digər otaqları və binada digər mənzillərə keçməsinin qarşısı alınıb”.