İLON MASK VƏ MARK ZUKERBERQ DÖYÜŞƏCƏK

Bölmə: Hadisə › ,
Tarix: 16:42 09.08.2023

Mütəmadi olaraq paylaşımları ilə ön plana çıxan milyarder iş adamı İlon Mask Meta şirkətinin həmtəsisçisi Mark Zukerberqlə etmək istədiyi döyüşlə bağlı gündəmdədir. Maraqlıdır, sakit biri olaraq tanınan Zukerberq belə bu döyüşlə bağlı müxtəlif paylaşımlar edir və fanatları həyəcanlandırır.

İlon Mask və Mark Zukerberq arasında ilk başda zarafat olaraq ortaya atılan döyüş mövzusu qısa müddət ərzində dünya gündəmində əsas müzakirə mövzularından birinə çevrildi. Hələ iyunun əvvəli başlayan mübahisə fonunda “Meta” menecerlərindən biri şirkət rəhbərliyinə "Twitter"-ə rəqib hesab edilən “Threads” tətbiqini təqdim edib. Bunun ardınca İlon Mask sözügedən məlumatları tənqid etdikdə sosial şəbəkə istifadəçilərindən biri milyarderə Mark Zukerberqin ciu-citsu idman növü ilə məşğul olduğunu və ehtiyatlı olmasını tövsiyə edib. Buna qarşılıq Mask “Qəfəs döyüşünə hazıram” deyə milyarderə çağırış edib. Zukerberq isə sözügedən döyüşə hazır olduğunu və döyüşün olacağın məkanın adresini istəyib.

Daha sonralar həm Zukerberq, həm də Maskın öz platformalarından paylaşdığı xəbərlər məsələnin ciddi olduğunu və ikili arasında döyüşün yaxın tarixlərdə olacağını göstərir. Belə ki, ilk olaraq Mark Zukerberq İlon Maskla döyüşə hazır olduğunu yenidən təsdiqləyib və “Threads” sosial şəbəkəsində bununla bağlı paylaşım edib. Onun sözlərinə görə, Maska avqustun 26-sı döyüş keçirməyi təklif etsə də, ondan təsdiq cavabı almayıb. Digər tərəfdən döyüşün tarixi ilə bağlı razılıq əldə olunmasa da, Mask artıq döyüşün "Twitter" sosial şəbəkəsində canlı yayımlanacağını bildirib. Həmçinin Mask əlavə edib ki, tədbirlə əlaqədar toplanan vəsaitlər xeyriyyə məqsədilə xərclənəcək.

Tərəflər arasında döyüş prossesinə hazırlıq da güclü formada davam edir. Belə ki, İlon Mask mütəmadi olaraq ofisində qantellərlə çəki məşqləri etdiyini deyib. Paralel olaraq Mark Zukerberq Braziliya "Ciu-Citsu" növü ilə məşğuldur. Buna baxmayaraq iki milyarder arasında yaş və çəki kateqoriyasında ciddi fərqlər var. 52 yaşlı Mask 39 yaşlı Zukerberqdən ən azı 30 kq ağırdır. Rəsmi qarışıq döyüş sənəti döyüşlərində idmançıların çəkisi isə adətən bərabər olur.
Bu arada İlon Mask bildirib ki, Mark Zukerberqlə döyüşdən əvvəl belindən əməliyyat ola bilər. Maskın sözlərinə görə, yaxın gələcəkdə boyun və onurğanın yuxarı hissəsinin MRT-dən keçəcək. Həmçinin milyarder qeyd edib ki, onurğa əməliyyatına ehtiyac olub-olmamasına həkimlər qərar verəcəklər və bu müdaxilə onun "Meta"nın rəhbəri ilə barışmaq əzmini əngəlləyəcək.

CAVİD