Hindistanda daşqınlarda ölənlərin sayı 69-a çatıb

Bölmə: Dünya › ,
Tarix: 21:30 04.07.2025

Hindistanın Himaçal Pradeş ştatında güclü yağışların səbəb olduğu daşqın və torpaq sürüşmələri nəticəsində həyatını itirənlərin sayı 69-a yüksəlib.

 

Yeni Dehlidə yerləşən NDTV telekanalının məlumatına görə, ölkənin şimalında yerləşən Himaçal Pradeş ştatı iyunun 20-dən etibarən musson yağışlarının təsiri altındadır.

 

Güclü yağışların yaratdığı daşqın və torpaq sürüşmələri nəticəsində 20 iyun – 3 iyul tarixlərində ölənlərin sayı 69-a, yaralananların sayı isə 110-a çatıb.

 

Təxminən 250 yolun bağlandığı ştatın müxtəlif bölgələrində 37 nəfərin axtarış-xilasetmə işləri davam etdirilir.

 

Hindistan Meteorologiya Departamenti (IMD) Himaçal Pradeş üçün verdiyi xəbərdarlıqda güclü yağışların iyulun 7-dək davam edəcəyinin gözlənildiyini açıqlayıb.

 

“Times of India” nəşrinin məlumatına görə, ştat ərazisində yağışlar nəticəsində təxminən 46 milyon dollar məbləğində ziyan dəydiyi ehtimal olunur.

 

Haber Global 

Nuray Əliyeva