Tarixdə bu gün-Fəxrəddin Şahbazovun doğum günü

Bölmə: Araşdırma › ,
Tarix: 23:30 22.01.2024

Bu gün "Azərbaycanın Milli Qəhrəmanı", cəsur jurnalist, Qarabağ müharibəsi şəhidi Fəxrəddin Şahbazovun doğum günüdür.

 

Fəxrəddin Şahbazov 1950-ci ildə Bakı şəhəri anadan olub. Bakı şəhəri 20 saylı orta məktəbdə  təhsilini bitirdikdən sonra hərbi xidmətə gedən Fəxrəddin 1971-ci ildə ordudan tərxis olub. O, 1972-ci ildən Azərbaycan Teleradio Şirkətində işə başlayıb və 20 il burada fasiləsiz olaraq operator peşəsində çalışıb.

 

1988-ci ildən başlayaraq ermənilərin azərbaycanlıları Dağlıq Qarabağ və eləcə də, Qərbi Azərbaycan torpaqlarından zorla, silah gücü ilə çıxarması Fəxrəddini narahat edirdi. Fəxrəddin könüllü olaraq cəbhəyə gedir və qaynar döyüş meydanlarından reportajlar hazırlayır. Dəfələrlə təhlükə ilə üzləşməsinə baxmayaraq o yenə də cəbhəyə getməyə davam edirdi. 1991-ci ildə ermənilər Xocavənd rayonunda ağılasığmaz vəhşiliklər törədirdilər. Ermənlilər dinc sakinləri qətlə yetirir, kəndləri yandırırdılar. 20 noyabr 1991-ci il dövlət nümayəndələri və başqa bir neçə adam hadisəni araşdırmaq üçün Mİ-8 vertolyotu ilə Xocavənd rayonuna yola düşdülər.

 

Xocavəndin Qarakənd kəndi yaxınlığında ermənilər vertolyotu iri çaplı pulemyotlardan atəşə tutdular. Vertolyot yerə düşərək parçalandı və bütün heyət həlak oldu. Bu şəhidlərin arasında Şahbazov Fəxrəddin də var idi.

 

Ölümündən sonra Fəxrəddin Şahbazova Azərbaycan Respublikası prezidenti Əbülfəz Elçibəyin 4 dekabr 1992-ci il tarixli 344 saylı fərmanı ilə "Azərbaycanın Milli Qəhrəmanı" adı verilib.

 

Yusif Mamedov